Тываның Баштыңы Владислав Ховалыг Өвүр кожуунче ажыл албан аайы-бие чорааш, тускай шериг операциязының хоочуннары Ай-Мерген Ооржак, Аян Мандыл-оол база Чимит Монгушга ужурашкан. Олар үжелээ дайынчы хүлээлгезин күүсетеш, төрээн чериниң сайзырал хөгжүлдези дээш ажылче кирген. Владислав Ховалыг бодунуң блогунда оларның дугайында чылыг сөстерини бижээн.
Ай-Мерген 23 харлыында керээни чарып, бурят танк бригадазының “боттуң” кежигүнү апарып тулчуп чорааш, балыглангаш халашкан. Амгы үеде кожуун чагыргазында чуртталга-коммунал ажыл-агый болгаш чаагайжыдылга талазы-биле кол специалист кылдыр ажылдап, эрге-чагырга ажылында бодун шенеп чоруур. Келир үениң удуртукчузу чоокта чаа кожуун төвүнде ажыттынган фонтанны тударынга киришкен. Улуг эвес фонтан чаңгыс чер чурттакчыларынга, ылаңгыя уругларга, улуг өөрүшкүнү сөңнээн. «Улуг чедиишкиннер мындыг бичии ажыл-херектерден үнер» - деп, Владислав Ховалыг чаа эгелеп чоруур ажыдакчыны деткээн.
Хоочуннуң баштайгы чедиишкини шилип алган оруунга улуг бүзүрелди берген – «Тываның маадырлары» республиканың кадрлар программазынче киржир дугайында билдириишкинни кииргеш, шылгалдаларын эртип турар. Республика Баштыңы Ай-Мергенниң чаңгыс чер-чурттугларынга бараан болуп, төрээн республиказын көдүрер дээн күзелин бүрүнү-биле деткээн. ТШО-га киржири дээрге чүгле дайынчы эвес, а, ылаңгыя кижилер-биле ажылдаарынга онза херек амыдыралдың улуг арга-дуржулгазы-дыр деп Владислав Ховалыг чугаалаан.
Аян Мандыл-оол шеригже кезек мөөңнээшкин үезинде кыйгырткан. Өг-бүлениң 32 харлыг ээзи үш ажы-төлдүг бооп, шеригже кыйгыртпас эргезин ажыглап болзур турган, ынчалза-даа ол ону шын эвес деп санаан: «Мен ажы-төлүмге соонда чүнү чугаалаар мен, чүге оларның келир үези дээш демисежиринден ойталаанымны, чүге өскелерниң артынга чаштынып алганымны канчаар тайылбырлаар мен?». ТШО-дан төрээн Өвүрүнге чанып келгеш, тайбың ажыл-иш - хой өстүрүп азыраар деп шиитпирлээн. Ынчалза-даа ол шериг эштерин утпаан, фронтуга гуманитарлыг дуза кылдыр өг-бүлези үлүүн киирип чоруур.
Хоочуннарның эң улуу 40 хар ажа берген. Чимит Монгуш элээн каш шериг шаңналдарынга төлептиг болган. Ээп чанып келгеш, социал керээни чарып, мал ажылынче кирген.
«Бистиң камгалакчыларывыстың өг-бүлелерин деткип турарынга кезээде өөрүп чоруур мен. Өг-бүле дээрге эң-не кол чүүл-дүр. Төрээн черинге дузалажыр чүткүлдү көрдүм. Оларны ыяап-ла деткиир бис» - деп, Владислав Ховалыг хоочуннар-биле чугаалашкан соонда бодунуң арнында бижээн.