Июнь 27-ден 30-ге чедир Тывага «Дүнгүр» хам чүдүлгениң дөрткү делегей чергелиг фестивалы болуп эртер. Вавилин ээтпээниң 13-кү км-инде «S» турисчи дыштанылга баазазынга ( «Алдын-Хараал» дыштанылга төвү турган чер) ол болур.
Бөгүн ТР-ниң Чазааның Даргазының оралакчызының хүлээлгезин күүседип турар Айдыс Сынааның удуртуп эрттирген оргкомитеттиң ээлчеглиг хуралында хемчегниң белеткелин болгаш шиитпирлээр айтырыгларын сайгарган.
«Дүнгүр» фестивалы республиканың шылгараңгай эртемдени, Тываның Улустуң чогаалчызы база төөгү эртемнериниң доктору, сураглыг хам болгаш «Хамнаашкынның дириг эртинези» деп делегей чергелиг ховар аттың эдилекчизи, бүгү назынында тыва культураны база хам чүдүлгезин шинчилээн Монгуш Борахович Кенин-Лопсанга тураскаадып эртер. Регионнуң Националдар херектериниң талазы-биле агентилел, Культура яамызы база Тываның «Дээди хамның эргелели» төпчүткен хамнаашкын организациязы ону удуртуп-башкарар.
Организаторларның тайылбырлааны-биле алырга, делегей культуразының өнчү-салгалының чугула кезээ болур хам чүдүлгеже база бурунгу ужур-сагылганың амгы үеде эдилекчилери болур тыва хамнарже кичээнгейни угландырып тургаш, чоннар болгаш чүдүлгелер аразында эп-найыралды быжыглаары – фестивальдың кол сорулгазы. Оон аңгыда, фестиваль Тыва Республиканың девискээринге иштики туризм адырында турисчи арга-хевирлерни нептередиринче, тыва чоннуң ёзу-чаңчылдарын нептередиринче угланган.
Бо чылын фестиваль Россияның аңгы-аңгы булуңнарындан болгаш даштыкы чурттардан 2000 ажыг киржикчилерни, оларның аразында массалыг информация четкилериниң, хөй-ниити организацияларының төлээлерин база бурунгу ёзулалдарны, чаңчылдарны болгаш хам культуразын сонуургап чоруур аалчыларны хаара тудар. Дээди хам эргелелиниң дыңнатканы-биле алырга, Кыдаттан, Перудан, Казахстандан, Германиядан база Моолдан киржикчилер чагыгны киирген. Фестивальдың //tuva-fest.ru/ албан езузунуң сайтызында хемчегге киржир күзелдиг кижилерден билдириишкиннерни хүлээп турар.
Фестиваль хүннеринде уттундурбас болгаш сонуурганчыг хемчеглерни планнаан. Ылаңгыя хамнарның чыскаалы, элээн каш черлерге этниктиг хөгжүм концерти, М.Б.Кенин-Лопсанның 100 харлаанынга турскааткан база Россияда хамнаашкын темазынга “төгерик столдар”, Тыва Республиканың хамнар ниитилелдеринден болгаш келген аалчылардан мастер-класстар, хамнар организацияларының көргүзүглери, ол ышкаш «Чурук-биле ажыл» база «Хааржакта чажыт» мөөрейлер соонда шыырак хамнарны илередир мөөрейлер солун болуру чугаажок.
2022 чылдың июнь 20-ден 22-ге чедир «Алдын-Булак» этнокультурлуг комплекизинге хамнаашкынның «Дүңгүр» деп 1-ги фестивалы болуп эрткенин сагындыраал. Аңаа Россияның аңгы-аңгы регионнарындан 300 ажыг хамнар киришкен. Оон бээр-ле фестиваль чылдың-на эртип, Тыва Республикада болуушкуннуг туризм адырында онзагай черни ээлеп, регионче хөй санныг туристерни хаара тудуп турар.