Тываның Тудуг яамызының дыңнатканы-биле алырга, май 28-ке чедир «Амыдыралга инфраструктура» национал төлевилелдиң «Таарымчалыг хоорай хүрээлеңин тургузары» федералдыг программа күүселдези-биле 2026 чылда чаагайжыдар хөй-ниити шөлдерин шилиириниң бүгү-российжи бадылаашкынынга республиканың 80 муң ажыг чурттакчылары киришкен.
Тываның 19 муниципалдыг тургузугларының он черниң чурттакчылары идепкейлиг хамааты туружун көргүзүп, оларның бодалы-биле алырга, төрээн хоорайынга, кожуунунга боттандырар ужурлуг төлевилелдер дээш үнүн бергеннер. Бадылаан үннер саны-биле хожудаан административтиг девискээрлерде чурттап турар хамаатылар байдалды эдип алырынга ам-даа ийи неделя бар. Июнь 12-ге чедир оларны golnk.ru/RW2Vk (https://vk.com/away.php?to=https%3A%2F%2Fgolnk.ru%2FRW2Vk&utf=1) деп айтыг таварыштыр бадылап, хөй-ниити черлерин чаагайжыдар төлевилелдеринге федералдыг деткимчени чедип ап болур.
Май 28-тиң байдалы-биле алырга, бадылаашкын талазы-биле Чөөн-Хемчик, Барыын-Хемчик кожууннар база Ак-Довурак хоорай мурнап турар. Каа-Хем биле Сүт-Хөл кожууннарның чурттакчы чону суурларының архитектурлуг хөгжүлдезинге улуг сонуургалдыын көргүскен. Бо муниципалдыг тургузугларның чагыглары федералдыг программадан деткимче алыр төлевилелдер санынче кирер аргазы бар. Улуг-Хем кожуун болгаш Кызыл хоорай дээн ышкаш муниципалдыг тургузуглар чыдып каан. Бай-Тайга, Каа-Хем, Тожу, Өвүр, Эрзин база Тес-Хем кожууннарның чурттакчылары көскүзү-биле идепкейжээн.
Чыдып каан муниципалитеттер волонтерларны ажылче хаара тудуп, күш-ажылчы коллективтер, өөренип турар аныяктар ортузунга бадылаашкынны организастаарын сүмелээн. Аныяктар херээниң яамызы албан черлеринче, бүдүрүлгелерже болгаш өөредилге организацияларынче волонтерларның үнүүшкүннер графигин тургузуп бээрин муниципалдыг тургузугларга саналдаан.
Республиканың муниципалдыг тургузугларында чаагайжыдылга төлевилелдерин шилиир бүгү-российжи бадылаашкынче 69 объектини кииргенин, ооң аразындан 30 хөй-ниити шөлдерин шилип алырын сагындыраал.
Бо хүннерде Бажың-Алаак суурга Алдар аллеязын тургузар, Теве-Хая суурга стадион чаагайжыдар база Ак-Довурак хоорайның Ленин кудумчузун дургаар кижи кылаштаар орук тудар төлевилелдер эң хөй үннерни алгаш, мурнап турар.