Тываның Баштыңы Владислав Ховалыгның Өвүр кожуунга эрттирген үнүүшкүннүг хуралында, “Хандагайты” автомобиль эрттирилге пунктузунда чаартылга ажылдарының чоруп турарын чугаалашкан. “Роскызыгаартудуг” федералдыг күрүнениң казна албан чериниң Новосибирскиде салбырының директору Александр Сирчук, “Оргэнерготудуг” институт АН-ның “Хандагайты” тускай салбырының удуртукчузу Александр Кузик, республиканың орук-транспорт комплекизиниң болгаш тудуг сайыттары болур Шораан Чыргал-оол биле Артыш Кыргыс, Россияның ФАА-ның Тыва Республикада кызыгаар эргелелиниң, Красноярск таможнязының, “Россети Сибирь Тываэнерго” АН-ның, Өвүр кожуун чагыргазының төлээлери болгаш өскелер-даа ажыл-агыйжы ужуражылгага киришкен.
"Роскызыгаартудуг" биле “Оргэнерготудуг” институт АН эрттирилге пунктузун эде чаартырының күрүне керээзин аразында чарган. Тудуг-монтаж ажылдарын ийи чадага планнаан болгаш, 2023 чылдың декабрьда ону доозар турган. Ынчалза-даа төлевилел документациязын эде кылганындан база күрүне экспертизазын эрттиртири-биле ооң хуусаазы соңгаарлаттынган. Владислав Ховалыг "Роскызыгаартудугнуң" удуртукчузу Геннадий Безлобенко база РФ-тиң Транспорт яамызының чогуур департаментизиниң директору Михаил Кокаев бо чылдың февральда ужурашкаш, ажылды 2025 чылдың төнчүзүнде доозар деп дугурушкан.
Регионнуң Баштыңы ол объектиге чорда, бо чылын ажылдың чүгле бирги чадазын доозар дээш бүгү күжениишкиннерни үндүрүп турарын харыысалгалыг специалистер дыңнаткан. Май төнчүзүнде эптеп-чыыр дериг-херекселдер келир, а июнь ортандан бээр тудугжуларның саны беш катап көвүдээр деп илеткээн.
Республика Баштыңы чоокку айларда сөөлгү төнчү хыналданы эрттирерин дыңнаткан. Аңаа «Роскызыгаартудуг» ФККА-ның удуртулгазы албан киржир.
«Тываның, Сибирь регионнарының, Моолдуң чоок-кавы аймактарының чурттакчылары болгаш бизнес-структуралары база Кыдаттың төлээлери тудугнуң дүрген доостурун манап турар. Экономиктиг кады ажылдажылгага көңгүс чаа аргаларны ол ажыдар» - деп, Владислав Ховалыг чугаалаан.
Тываның Моол-биле кызыгаарында «Хандагайты» эрттирилге пунктузунуң эде чаартылгазын Россия Федерациязының Транспорт яамызы биле «Роскызыгаартудуг» ФККА иштинде ведомство «Россия Федерациязының күрүне кызыгаары» федералдыг тускай сорулгалыг программа боттанылгазы-биле кылып турар. «Россия Федерациязының күрүне кызыгаары» федералдыг тускай сорулгалыг программа-биле 2022 чылда ажылдар эгелээн. «Урумчи (Кыдат) – Ховд (Моол) - Улангом (Моол) – Хандагайты (Россия)» чурттар аразының автомобиль оруунуң Моолдуң талазында «Боршоо» эрттирилге пунктузунга делегей чергелиг эрге байдалды тывысканы, хемчегни эгелээринге идиг болган.
Планнаттынган бүгү ажылдар доозулган соонда, эрттирилге пунктузу дүн-хүн дивейн ажылдаар чурумче шилчип, хөй талалыг эрге-байдалды ап, чүгле Россия база Моолдан эвес, а үшкү чурттардан база чүък сөөртүкчүлеринге кызыгаар эртер арганы бээр.
“Хандагайты” эрттирилге пунктузунуң хөй талалыг чурумга ажылдап эгелээри – Сибирьден Тыва Республиканың девискээрин таварты Моол болгаш Кыдатче транспорт оруун тударынга кол барымдаа апаар. Тываның Баштыңы Владислав Ховалыгның саналы-биле Россия Федерациязының Президентизиниң деткимчезин алган чурттар аразының транспорт оруунуң төлевилели 2035 чылга чедир Сибирьниң социал-экономиктиг хөгжүлдезиниң чаа стратегиязынче кирген.