Регионналдыг Өөредилге яамызының дыңнатканы-биле алырга, бо чайын республикада школачыларның чайгы дыштанылга үезинде уругларның идепкейлиг, ханы уткалыг болгаш айыыл чок хостуг үезин хандырар сорулгалыг 200 ажыг түр үениң дыштанылга төптери ажыттынып, график ёзугаар халас ажылдаар.
Өөредилге яамызы шугуму-биле немелде өөредилге шөлдеринге 18 түр үениң дыштанылга төптери ажылдап, 7-ден 17 хар чедир назылыг 1200 ажыг школачыларны хүлээп алыр. Уругларга чуруп, чазаныр бөлгүмнер ажылдаар, спортчу хемчеглер эртер, аңаа эш-өөрнү тып, чаа чүүлдерни билип алыр аргалыг. Хемчеглер мөзү-шынар кижизидилгезинче, угаан-медерел, бүгү талалыг чогаадыкчы сайзыралче болгаш кадыкшылгаже угланган.
Спортчу объектилерге түр үениң 30 төвү ажылдаар: спорт школалар болгаш «Эзирлер уязы» 1200 хире уругну хүлээп алыр. Эртенги сула шимчээшкиннерни, волейбол, баскетбол, футбол, шахмат, мячилиг хоккейни программаже киирер. Уруглар ГТО нормативтерин дужаарынга белеткенип, солун мөөрейлерге болгаш янзы-бүрү угаан оюннарынга киржип, кады кинолап, национал оюннарны шиңгээдир. Оон аңгыда арга-арыгга, оруктарга, суг объектилеринге айыыл чок чорук дүрүмнериниң дугайында ажыктыг чугааларны кылыр. Кадык амыдыралдың, бойдустуң болгаш экологияның дугайында хөйнү билип ап, чурук мөөрейлеринге киржир. Оон аңгыда Ада-чурт камгалакчызының чылынга база Ада-чурттуң Улуг дайынынга Тиилелгениң 80 чыл оюнга тураскааткан темалыг хемчеглерни организастаар.
Культура албан черлери – библиотекалар болгаш культура төптери база бажыңнарынга түр када дыштаныр 141 төптер ажыттынар, аңаа 7900 хире уруглар дыштаныр. Оларга патриотчу, мөзү-бүдүш кижизидилгезин болгаш кадык амыдыралды суртаалдаарынче угланган 7 муң ажыг культурлуг болгаш дыштанылга хемчеглери планнаттынган. Оларның чамдыызын «Баштайгыларның шимчээшкини» регионалдыг салбыр-биле кады эрттирер.
Бо чылын республиканың Кызыл, Таңды, Улуг-Хем, Бии-Хем база Чеди-Хөл кожууннарда өг-бүлеге болгаш уругларга социал дуза төптеринге 5 дыштанылга черлери ажыттынар. Регионнуң Күш-ажыл яамызының дыңнатканы-биле, ортумак болгаш үстүкү школа назылыг уругларны хүндүскү лагерьлер манаар. Түр үениң дыштанылга төптеринге кээр 270 школачыга Ада-чурттуң Улуг дайынынга Тиилелгениң 80 чыл оюнга тураскааткан өөредилге программазын белеткээн.
Бо чылын «Алгоритмика» чайгы хуу школа, Тываның республиканың лицей-интернадынга чайгы математика школазы, Иван Ярыгин аттыг спорт комплекизи, «Индиго» немелде өөредилге төвү, К.Б. Ондар аттыг Тыва культура төвүнде «Чайлаг» лагери түр үениң дыштанылга төптериниң реестринче киргенин, регионалдыг Өөредилге яамызы дыңнаткан.
Чижээлээрге, Тыва үндезин культура болгаш ус-шеверлер хөгжүлдезиниң төвүнүң чанында этнокультурлуг угланыышкынныг «Чайлаг» чайгы дыштанылга төвү 8-14 харлыг чээрби хире школачыларга дыштанылганы организастаар. Уругларга тыва чоннуң чаңчылдары болгаш уран чүүлүнүң дугайында билиглерин суртаалдаан программаны организакчылар белеткээн. Игил, бызаанчы, дошпулуур дээн ышкаш, тыва хөгжүм херекселдери-биле таныжып, национал оюннарны өөренип, хөөмейлээриниң эге чадаларын шиңгээдип, тыва дылды өөренип, малчын аалче экскурсиялаар. Июньнуң 2-ден 15-ке ажылдаар лагерьге дыштандырарда, ада-иелер төлевирни төлээр.
Ынчалдыр чайгы үеде түр үениң дыштанылга төптерин организастаанының ачызында, Тываның школачылары дагдыныкчыларның хайгааралы-биле хүн бүрүде чаа чүүлдерни билип ап, мага-бодун сайзырадып, ынак спорту-биле ойнап, солун бөлгүмнерге болгаш чогаадыкчы мастер-класстарга барып, аңгы-аңгы мөөрейлерге киржир аргалыг. Республикада 13 муң хире чаштарны болгаш элээдилерни организастыг дыштанылганың бо хевиринге хаара тударын баш бурунгаар санаан.