2019 чылдан 2024 чылга чедир республикада национал төлевилелдер күүселдезиниң түңнелдерин үндүрер хемчегже Тываның чурттакчыларын болгаш аалчыларын чалаан. Майның 29-та Ленин кудумчузунда Арат шөлүнге яамылар болгаш ведомстволарның киришкени делгелгеге чурттуң Президентизи Владимир Путинниң эгелээни боттандырган нацонал төлевилелдер составында федералдыг программаларга киришкениниң түңнелдерин таныштырар.
Тываның Баштыңы Владислав Ховалыгның даргалааны Республиканың Чазаанда Стратегтиг хөгжүлде болгаш национал төлевилелдер талазы-биле чөвүлел хуралының үезинде хемчегниң албан кезээ болуп эртер.
Майның 29-та 11.00 шактан эгелеп, Ленин кудумчузунга яамылар болгаш ведомстволар боттарының делгелгезин делгеп, национал төлевилелдерге киржилгезиниң түңнелдерин көргүскен медээлерни таныштырар. Аңгы-аңгы национал төлевилелдер шугуму-биле регионнуң алганы медицина, өөредилге дериг-херекселдерин, тускай технологияларны бир шөлге делгээр.
Чижээ, Тываның Кадык камгалал яамызы «Кадык камгалал» национал төлевилели-биле алган көжүп чоруур флюорография биле маммографиязын ажыглап, күзээн бүгү кижилерге ачы-дузаны көргүзер.
Арга-арыг яамызы «Экология» национал төлевилел-биле республикага келген, амгы үеде арга-арыг инспекторларынга арга-арыгны хайгаарап, арга-арыг өрттерин өжүреринге дузалап турар тускай техниканы делгеп салыр.
Ол ышкаш шупту сонуургалдыг кижилер чуртталга тудуу, социал адыр специалистеринден, сайгарлыкчы чорукту деткиир хемчеглер талазы-биле эксперттерден, туризм болгаш көдээ ажыл-агыйны хөгжүдер талазы-биле консультацияларны алыр аргалыг.
«Биче болгаш ортумак сайгарлыкчы чорук» национал төлевилел күүселдези-биле деткимче алган сайгарлыкчылар продукциязының болгаш барааннарының делгелге-садыглаашкынын эрттирер.
«Өөредилге» национал төлевилелдиң «Профессионалитет» федералдыг программазының кластерлеринде ажылдап турар техникумнарның шөлдери Өөредилге яамызының экспозициязының эң улуг девискээрин ээлээр. Кызылдың транспорт техникумунуң, Тываның политехниктиг, Тываның тудуг, Тываның агроүлетпүр, Тываның көдээ ажыл-агый, Тываның информация технологияларының база Тываның көдээ ажыл-агый технологияларының техникумнарының сургуулдары электромонтажка, «содак-шудак» быжып-даараарынга, тыва согун-чаны кылырынга, хананы шеверлээринге, ветеринария талазы-биле, робототехникага, чонар-даштан чазанырга мастер-класстарны көргүзер. «Өөредилге» деп национал төлевилели-биле алган «Мобильдиг кварториум» 3D модельдер болгаш макеттер кылырының арга-хевирлерин таныштырар.
Тываның Чурагайлыг хөгжүлде яамызы бодунуң шөлүнге Тыва Республиканың интерактивтиг картазын бараалгадыр, ол-ла шөлге МФЦ специалистери Күрүне ачы-дузазының порталының сервистерин ажыглаарының талазы-биле консультацияны күзелдиг кижи бүрүзүнге бээр. Ведомствонуң удуртукчузу Идегел Монгуш «Чурагай кичээлин» эрттирип, аңаа «Чурагай экономиказы» национал төлевилел республиканың ыраккы суурларынга дүрген дамчыыр Интернетти чедингир болурунга канчаар дузалаарын чугаалаар.
«Культура» национал төлевилел боттаналгазы-биле Культура яамызының хүлээп алганы автоклубтуң сценазынга ат-сураглыг күүседикчилерниң концерт номерлери болур.
2019 чылдан 2024 чылга чедир Тыва Республикага «Кадык камгалалы», «Өөредилге», «Демография», «Чурттаар оран-сава болгаш хоорай хүрээлеңи» база «Культура» национал төлевилелдерниң хемчеглер күүселдези-биле социал ужур-дузалыг объектилерниң тудуу, септелгези, чаагайжыдылгазы база эде чаартылгазы чоруттунган.