Бөгүн, майның 26-да, чуртта Россияның сайгарлыкчы чорук хүнүн демдеглеп турар. РФ-тиң Президентизиниң 2007 чылда үндүрген Чарлыы-биле экономиктиг хөгжүлдениң айтырыгларынче болгаш ортумак, биче болгаш улуг сайгарлыкчы чоруктуң чугула айтырыгларынче кичээнгейни угландырары-биле ол хүннү тургускан.
Тываның Баштыңы Владислав Ховалыг регионнуң сайгарлыкчы чорук ниитилелинге профессионал байырлалы-биле байырны чедирген. Республика Баштыңы албан езузунуң блогунда парлаттынган бижиинде Тывада биче болгаш ортумак сайгарлыкчы чоруктуң хөгжүлдезинде чогумчалыг бурунгаарлаашкынны демдеглээн. Ылаңгыя биче болгаш ортумак сайгарлыкчы чорук адырында ажылдап турарларның саны көвүдээн. Садыг-саарылга эргилдези өскен: эрткен чылдың түңнелдери-биле алырга, ол көргүзүг 8,5 млрд. рубль өзүлдени көргүскен, ооң ачызында регионалдыг казнаже 208 млн. рубль немелде үндүрүглер чыгдынган.
Владислав Ховалыг тускай шериг операциязының киржикчилеринге болгаш оларның өг-бүлелеринге ачы-буянны көргүзүп чорууру дээш база хөй ажы-төлдүг өг-бүлелерге, уругларга болгаш спортчу командаларга деткимчези дээш Тываның сайгарлыкчыларынга четтиргенин илереткен.
Тываның Баштыңы амгы үеде, 2030 чылга чедир үеде регионнуң тускай хөгжүлде программазының чаа чадазын боттандырып эгелээнде, салдынган сорулгаларны чедип алырынга улуг корпорациялардан эгелээш, микробүдүрүлгелерге чедир амгы экономиктиг субъектилер кол черни ээлеп турар дээрзин демдеглээн.
«Силерниң ажыл-чорудулгаңарда шупту чүве белен болгаш амыр эвес дээрзин билир мен, республиканың болгаш муниципалдыг эрге-чагыргалардан шиитпирлер негеттинип турар айтырыглар бар. Бистиң ниити сорулгавыс – продукция бүдүрүлгезин көвүдедир болгаш чаа ажылчын олуттарны тургузар. Күрүне деткимчезиниң бар бүгүарга-хевирлерин оон-даа идепкейлиг ажыглаар бис» - деп, Тываның Баштыңы демдеглээш, республиканың сайгарлыкчыларынга чедиишкиннерни болгаш чечектелиишкинни күзээн.
«Шынарлыг болгаш чижилгелиг экономика» национал төлевилел күүселдези-биле Россияның сайгарлыкчы чорук хүнүнүң бүдүүзүнде, Тывага сайгарлыкчы чорук неделязы болуп эрткен. «Мээң бизнезим» төп база Тываның «Садыг-үлетпүр палатазы» эвилелдиң дузазы-биле Тыва Республиканың Экономиктиг сайзырал болгаш үлетпүр яамызы ол хемчегни организастаан.
Неделяның хемчеглеринге «Ча-согун» кылыр, национал идик-хеп даараар болгаш кидис-биле ажылдаарының мастер-класстарын эрттирген. Туризм адырының төлээлери өөредилге хемчеглеринге киржип, чалаттырган эксперттер хоойлуларда өскерилгелерни демдеглеп, турисчи продуктуларны акшаландырарын, төөгү-культура туризмин хөгжүдериниң дугайында чугаалап, тус черниң практикаларын болгаш чедиишкинниг чижектерни таныштырган. «TожуТур» турисчи компанияның дугайында аудиобижидилгени база «МОЙ БИЗНЕС: Бизнес-НАВИГАТОР» деп өөредиглиг семинарны организастаан. Сайгарлыкчылар шыдыраа ойнап, амгы чаңчыл езугаар сайгарлыкчы чорук аллеязынга субботникке киришкеннер. Майның 23-тен 25-ке чедир «Субедейге» эрткен «Енисей-Экспо 2025» деп делгелге болгаш ярмарка неделяның төнчү хемчеглери болган.
Регионнуң Экономиктиг сайзырал яамызының дыңнатканы-биле алырга, амгы үеде Тывада 10487 биче болгаш ортумак сайгарлыкчы чорук субъектилери ажылдап турар. Ол дээрге 7 ортумак, 97 биче база 10383 хензиг бүдүрүлгелер-дир. Ниитизи-биле 8955 хууда сайгарлыкчылар база 1532 юридиктиг черлер бүрүткеттинген. Эрткен чылга деңнээрге, биче болгаш ортумак сайгарлыкчылар саны 868 санга азы 9 хуу өскен.
Хууда сайгарлыкчы деп эрге-байдалы чок, бодун ажыл-биле хандыртынган кижилерниң саны 22166 кижи. Амгы үеде регионнуң биче болгаш болгаш ортумак сайгарлыкчы чорук адырында Тываның шупту 40128 чурттакчызы ажылдап турар, эрткен чылга деңнээрге 6241 кижи хөй. А 2019 чылдан бээр ол көргүзүг 25481 кижиге, азы 57,4 хуу өскен.