Россияның Маадыры, РФ-тиң Айыыл чок Чөвүлелиниң секретары база Россияның Президентизи Владимир Путинниң шериг-үлетпүр комплекизиниң талазы-биле оралакчызы Сергей Кужугетович Шойгу бөгүн 70 харлап турар.
Тыва Республиканың Баштыңы Владислав Ховалыг бодунуң блогунда шылгараңгай чаңгыс чер чурттувуска ооң-биле холбаштыр байыр чедириишкинин парлаан.
Тываның Баштыңының байыр чедириишкининде, Россияның езулуг патриоду болур Сергей Шойгу Россияның Шерииниң күчү-күжүн болгаш тура-соруун көдүрүп, Ада-чурттуң камгалакчыларынга хүндүткелди катап оттурарынга дыка хөйнү кылган деп демдеглээн.
«Адазының, өг-бүлезиниң ыдык чагыгларын эдерип, хөй-ле сөстер чокка төрээн республиказынга дузазын көргүзүп чоруур. Тывазының бойдус-чурумалынга ынакшылы, археология болгаш төөгүге сонуургал. Ховар номнар коллекциязы, тыва культураның классиктериниң чогаалдарынга болгаш тыва тоолдарга даянгаш, чогаадыкчы ажылды кылып чоруур аныяк талантыларга деткимче. Кужугет Шойгу аттыг культура фондузу улуг дузалыг база хемчээлдиг төлевилелдерни боттандырып чоруур – деп Владислав Ховалыг социал четкилерде бодунуң блогунда бижээн. – Кезээде деткип чорууру дээш Сергей Кужугетовичиге четтиргеним илередип, быжыг кадыкшылды, аас-кежикти болгаш чедиишкиннерни сеткилим ханызындан күзедим!».
Бөгүн Кызылга Алдан-Маадыр аттыг Национал музейге Сергей Күжүгетович Шойгунуң 70 харлаанынга тураскааткан делгелге ажыттынар. Бистиң республиканың шылгараңгай чурттакчызының допчу-намдары-биле таныштырар кол делгелге экспозициязында көскү күрүне ажылдакчызының болгаш ооң өг-бүлезиниң хууда болгаш ажыл-ишчи коллекциязындан чуруктар болгаш материалдарны делгээн. Шупту 150 ажыг чуруктар болгаш 70 эт-херекселди ында киирген. Экспонаттар аразында хөрээнде шаңналдарлыг формазы, күрүне баштыңнарының белектери, чогаадыкчы ажылдар бар. Бо делгелгениң ачызында музейниң бодунга чаартылганы чоруткан. Тыва Республиканың Чазак даргазының оралакчызы Орлан Сарыглар, Күжүгет Сереевич Шойгу аттыг культура фондунуң даргазы Ирина Шойгу ооң ажыдыышкынынга сөстү алыр.
Сергей Кужугетович Шойгу 1955 чылдың май 21-де Чадаана хоорайга кожуун солунунуң редактору Күжүгет Шойгу биле зоотехник Александра Шойгунуң өг-бүлезинге төрүттүнген.
1977 чылда инженер-тудугжу кылдыр дооскан. Мастерден ажылдап эгелээш, он бир чыл дургузунда трестиң эргелекчизинге чедир депшээн. Ооң соонда Абакан хоорайның база Красноярск крайның чагыргазынга ажылдаан.
Сергей Шойгу 1991 чылда куруг черден Россяның камгалакчылар албанын үндезилээш, 1994 чылда ону ОБЯ кылдыр эде тургузуп, баштаан. Россияның ОБЯ-зы кыска хуусаа дургузунда делегейде эң-не тергиин камгалал албаннарының бирээзи апарган, а Шойгу боду чаңгыс эвес удаа Россияның тергиин сайыды диртип чораан. Ол “Чаңгыс демниг Россия” партиязының тургустунарынга дорт киришкен.
2012 чылда Шойгу РФ-тиң камгалал сайыдынга томуйлаткан. Ол албан-дужаалга шеригниң бүгү талалыг чаартылгазын чоруткан.
2024 чылдан тура Сергей Шойгу РФ-тиң Айыыл чок чорук чөвүлелиниң секретары болгаш РФ-тиң президентизи Владимир Путинниң шериг-үлетпүр комплекизиниң талазы-биле комиссиязының оралакчызы, Россия Федерациязының Айыыл чок чорук чөвүлелиниң эртем-эксперт чөвүлелиниң даргазы.