Бүгү чуртта доозукчуларга түңнел аттестация шылгалдалары чаңгыс график езугаар эртер. Тоску классчыларга шылгалдаларның кол чадазы эртен, май 21-де, даштыкы дылдарга шылгалда-биле, а он бирги классчыларга чаңгыс аай күрүне шылгалдазы май 23-те эгелээр.
Аттестацияга 9,8 муң хире өөреникчи киржир, оларның 7 муң хирези тоску классчылар, 2 муң ажыы – он бирги классчылар. Доозукчулар албан дужаар болгаш шилип алганы эртемнерге шылгалдаларны эртер.
Чаңгыс аай күрүне шылгалдазының кол хүннери:
Май 23 (пятница) – төөгү, литература, химия;
Май 27 (вторник) – ниити/ханы деңнелдиг математика;
Май 30 (пятница) – орус дыл;
Июнь 2 (понедельник) – ниитилел билиглери, физика;
Июнь 5 (четверг) – биология, даштыкы дылдар (бижимел кезээ), география;
Июнь 10 (вторник) – даштыкы дылдар (аас кезээ), информатика;
Июнь 11 (среда) – даштыкы дылдар (аас кезээ), информатика.
Тываның Өөредилге яамызының айытканы-биле алырга, бир эвес доозукчу шылгалда дужаар хүнде аарый бээр болза, эртемнер аайы-биле ЕГЭ-ниң курлавыр хүннеринде: июньнуң 16-20 база июнь 23-те дужаап ап болур.
Кандыг-бир эртемге демдээн экижидип азы катап дужаар дээн доозукчуларга эрткен чылда ышкаш, Чаңгыс аай күрүне шылгалдаларының немелде хүннерин киирген. Бо чылын июль 3 биле 4-те катап дужаап болур. Түңнелдери июль 15-те билдинер.
Эрткен чылдарның доозукчулары күрүнениң түңнел аттестациязының кол үезиниң немей киирген хүннеринде шылгалдаларны дужаар.
Бо чылын 153 кижи шылгалдаларже бүрүткеткен. Регионалдыг Өөредилге яамызының медээзинден алырга, күрүнениң түңнел аттестациязының (ГИА) үезинде шупту шылгалда пунктуларынга 4500 хире специалистер ажылдаар. Пункт бүрүзүнде хөй-ниитиниң корум-чурумун болгаш айыыл чок чоруун хандырар полиция ажылдакчылары, хайгааракчылар болгаш дежурный эмчи бригадалары турар.
Оон аңгыда эртемнер аайы-биле 13 комиссия болгаш хомудалдар сайгарар комиссияны тургустунган. «Сферум» платформазында англи дыл болгаш информатика болгаш ИКТ-ден аңгыда, апелляцияларны ырактан сайгарып көөр.