Тываның Чазаанга «Тываның маадырлары» регионалдыг кадрлар программазын күүседир талазы-биле оргкомитеттиң хуралы болуп эрттирген. Программаның конкурстуг шилилдезиниң күүселдезин болгаш онлайн-тестилерниң түңнелдерин, ол ышкаш мөөрейниң киржикчилери-биле амы-хууда чугаалажылганы организастаарын аңаа сайгарган. Шилилдеге киришкен 600 хире мөөрейжилерниң аразындан чүгле 30 кижини өөренир эргени алыр.
Тываның Баштыңы Владислав Ховалыг чаңгыс олутче 20 кижи кордап турар мөөрейни боду хайгаарап, шилилдениң шыңгыы болганын мынчаар тайылбырлаан:
«Программаның адындан-на харыызы билдингир. Ол дээрге бистиң, күрүне болгаш муниципалдыг албан черлеринге харыысалгалыг албан-дужаалдарны ээлеп, тайбың амыдыралга боттарының бурунгаар үзел-бодалдыг салым-чаяанын ажыглаарын тып алыр кижилер, бистиң үениң маадырлары-дыр – деп, Владислав Ховалыг социал четкилерде бодунуң блогунда бижээн. – Ажылчын бөлүк мээң даалгам-биле чүгле доозукчуларны эвес, а программаның өске-даа киржикчилерин ажылче хаара тудар янзы-бүрү аргаларны көрүп турар».
Кордакчыларның айтырыгларга харыылаар шылгалдазы май 15-те доозулган, ону 263 кижи эрткен. «Тываның маадырлары» регионалдыг кадрлар программазын боттандырар талазы-биле оргкомитеттиң даргазының оралакчызы Шолбан Хомушкунуң дыңнатканы-биле алырга, 10 санны ап болур ужурлуг тестированиениң түңнелинде 5-тен хөй санны алган боорда, федералдыг органнарның тускай хыналдаларын эрткен кордакчыларны амы-хууда чугаалажылгаже чалаар.
Чугаалажылгаже кирген кордакчыларның бүрүткедип тура айытканы программа киржикчилериниң хууда кабинеттеринче болгаш электроннуг почта адрестеринче чогуур медээлерни чорудар. РФ-тиң Президентизиниң чанында Россияның улус ажыл-агый болгаш күрүне албаны академиязының (РАНХиГС) күрүне эргелеп-башкарылгазының дээди школазының институдунга тускай белеткелди эрткен эксперттер майның 26-дан июнь 6-га чедир олар-биле тускай чугааны чорудар. “Тываның маадырлары” программа езугаар өөредилгеге киржир мөөрейниң 30 тиилекчилерин чугаалажылганың түңнелинде шилип алыр. Бо чылдың сентябрьдан эгелеп Тываның күрүне университединге «Күрүне болгаш муниципалдыг эргелеп-башкарылга» угланыышкыны-биле РАНХиГС-тиң бадылаан программазы езугаар, арга-дуржулгалыг удуртукчуларның дагдыныышкыны-биле өөредилгени эртер.
Тускай шериг операциязының киржикчилерден программаны сонуургаан айтырыглар оргкомитетче ам-даа кээп турар. Ылаңгыя, амгы үеде ТШО-нуң мурнуку одуругларында болгаш төлевилелге киржип четтикпээн улус чагыгны дужаап болур бе дээрзин айтырып турар. Программага киржир кордакчылар мөөрейниң айыттынган хуусаазы езугаар ээлчеглиг шыңгыы шилилделерни эртип турар болганда, амгы бо программага киржир билдириишкиннер хүлээп алыышкыны доозулган. Ындыг болзажок, “Тываның маадырлары” программаның күүселдези 2026 чылда база уламчылаар болганда, келир чылын ындыг арганы ажыглап болур.