Майның 13-те Тыва Республиканың Аныяктар херектери, Өөредилге, Культура, Спорт яамылары биле Бүгү-российжи Баштайгыларның шимчээшкининиң регионалдыг салбырының Кызыл мэриязы-биле кады организастааны «Даңгына болгаш Тажы» мөөрейниң бирги чадазы найысылал Кызылга болуп эрткен.
Россия Федерацияның Ада-чурт камгалакчызының чылынга тураскааткан мөөрей студент аныяктарның талантызын болгаш күчү-күжүн, эрес-дидим болгаш төрээн чуртунга ынакшылын көргүзүскен шөл болган. Майның 19-та дараазында чада – Интернет-бадылаашкын эгелээр. Шилилде чаданы эрткен сөс эжеш оолдар, кыстар мөөрейге киржир.
Советтиг Тываның 5 чылы стадионга болуп эрткен мөөрейниң бирги чадазында киржикчилер күш-шыдалын көргүзүп, ГТО нормаларын дужааган. Маргылдаага ыраан шураары, 60 метрни кыска үеде эртери, өрү тырттынары, черден иттинери, чыдып алгаш мага-бодун көдүрери дээн ышкаш шенелделер киирген. Оолдар 2 км, а оолдар – 5 км-ни халып эрткен. Шупту эки түңнелдерни болгаш спортчу шыырак белеткелди көргүскенин организаторлар демдеглээн.
Майның 19-тан 29-ка чедир мөөрейниң ийиги чадазы – Интернет-бадылаашкын болуп эртер. ВКонтактыда Тываның Аныяктар херектериниң талазы-биле яамының арынынга бадылаашкынны эрттирер.
Дараазында мөөрейниң киржикчилери Ада-чурттуң Улуг дайынының кол болуушкуннарынга хамаарышкан айтырыгларлыг тестини май 22-де эртер. Мөөрейниң түңнел кезээ майның 29-та болур.
ВКонтактыда Тываның Аныяктар херектериниң талазы-биле яамының vk.com/molodej_tuva арынындан мөөрей канчаар эртип турарын сонуургап болур.