«Узун болгаш идепкейлиг назын» национал төлевилелдиң кадык камгалалының бирги звенозун эде чаартыр программа-биле Чаа-Хөл суурда кожуун эмнелгезиниң оран-савазында улуг септелге ажылдары бо чылдың апрельде эгелээн. Тываның кадык камгалал сайыды Анатолий Югай септелге ажылдарын боду хайгаарап, эрткен неделяда ук объектиге четкен. Национал төлевилели-биле 2025 чылда Тывага беш кадык камгалал албан объектилерин септээр.
«Каменщик» КХН тудуг ажылдарын чорудар садыглажылганы ойнап алган. Тудуг чери ажылды пландан бир ай хире бурунгаар эгелээн. Эмнелгениң кырыкы шывыын адырыптарга, керээде көрдүнмээн немелде ажыл бары илереттинген. Ынчангаш тудуг чери чарган керээде көрдүнген баштайгы түңнү өскертпейн, апрель эгезинде немелде ажылдарның хемчээлин болгаш хевирлерин санап киирген.
Эрткен неделяда кадык камгалал сайыды объектиге чедип чорда, чырык, чылыг системаларын, изиг болгаш соок суг хандырылгазының хоорзаларын адырар ажылдар доозулган. Керээ чарган тудуг чери электри болгаш чылыдылга четкилерин солуур херек материалдарны садып алгаш, чаа радиаторларны, хоорзаларны, электри удазыннарын кожуп эгелээн.
Чаа-Хөл кожуун эмнелгезиниң төөгүзү 1931 чылдан эгелээн. Ынчан ол эрги Чаа-Хөлге бичии бажыңнарга турган. Эрги Чаа-Хөл чаа Чаа-Хөлче көжүп турда, эмнелге амгы үеде көдээ библиотека бажыңын ажыглап турган. А амгы кожуун эмнелгезиниң төп оран-савазын 1987 чылда туткан.
Тудугну ажыглалче кииргенден бээр улуг септелге ажылдары кылдынмайн, аңаа агар септелгелер чоруп турган. Президентиниң эгелээшкини-биле кадык камгалал объектизи ам бүрүнү-биле чаарттынар.
Амгы үеде Чөөн-Хемчиктиң кожууннар аразының эмнелге төвүнүң хирургия салбырының бажыңында, Таңды кожууннуң төп эмнелгезиниң Балгазын суурда эмнелге амбулаториязында, Тожу кожууннуң төп эмнелгезиниң поликлиниказында база Чеди-Хөл кожууннуң эмнелгезинде септелге ажылдары кидин-түлүк чоруп турар.