Бүгү-делегейниң өг-бүле хүнүнде Кызылдың өг-бүле парыгынга «Чылдың өг-бүлези – 2025» деп бүгү-российжи мөөрейниң регионалдыг чадазының тиилекчилерин шаңнаар байырлыг езулал болуп эрткен. Республиканың Чазааның Даргазының оралакчызы Орлан Сарыглар биле Тываның күш-ажыл болгаш социал политика сайыды Эдуард Сандан мөөрейге тиилээн өг-бүлелерге байырны чедиргеннер.
«Өг-бүле» национал төлевилел күүселдези-биле бүгү-россия чергелиг «Чылдың өг-бүлези – 2025» деп мөөрейни эрттирип турар. Ооң кол сорулгазы – өг-бүлениң чаңчылчаан үнелиг чүүлдерин быжыглаары болгаш нептередири, ол ышкаш чедиишкинниг өг-бүлелерниң үлегерлиг арга-дуржулгазын нептередири. Бо чылын мөөрейге бүгү республикадан 70 өг-бүле киришкен.
Кызыл кожуундан Юрий биле Айлана Оруспайларның өг-бүлези «Алдын өг-бүле» деп номинацияга тиилекчи болган. Өг-бүле 34 чыл дургузунда аас-кежиктиг чурттап, 4 төрээн болгаш 23 азырап алган ажы-төлүн өстүргеннер. Оларның көвей кезии студентилеп, ажыл-агыйда тургустунуп, өг-бүлелерни туткан. Өг-бүлениң уруглары шупту кызымак, мал-маганын ажылынга дыка дузалыг: инектерни саар, малды кадарар, огород ажылын кылыр. "Өске ажы-төлү чок!" деп оларның кыйгырыы амыдыралының ужур-утказы апарган.
«Ада-чурт камгалакчызының өг-бүлези» шаңналга Тожу кожуундан Рафаэль биле Светлана Хоядырларның өг-бүлези тиилээн. Өг-бүле шериг династияның езулуг үлегери – кырган-ачазы Ак Хайбал Седип-оол оглу Ада-чурттуң Улуг дайынынга тулчуп чораан, а Рафаэль Серенович – афган дайынының хоочуну. Өг-бүлениң шеригжи оруун оглу биле уйнуктары уламчылап, төрээн чуртунга ынакгшылын болгаш бердинген төлептиг көргүзүп чоруурлар.
«Хөй ажы-төлдүг өг-бүле» деп шаңналга Кызылдан Олимпий Монгуш биле Ондар Айнааш өг-бүлези төлептиг болган. Өг-бүле 12 ажы-төлдү өстүрүп турар, оларның аразында тускай шериг операциязының киржикчилери база бар. Маадырлыг чоруу дээш өг-бүлениң баштыңы “Эрес-дидим чорук дээш” медаль-биле шаңнаткан болза, улуг оглу Россияның Камгалал яамызының шаңналдарының эдилекчизи. Ажы-төлдүң авазы Айнааш Владимировна – Россия Федерациязының «Ие маадыр» аттың эдилекчизи, республиканың хөй-ниити амыдыралының идепкейжизи.
Мөңгүн-Тайга кожуундан Алдын-Буян биле Урана Хертектерниң өг-бүлези «Өг-бүле – ёзу-чаңчылдарның кадагалакчызы» деп номинацияга тергиидээн. Олар тыва үндезин культураны нептередиринге идепкейлиг киржип чоруурлар. Өг-бүлениң баштыңы улусчу ус-шевер, а улуг оолдары ачазының изин истеп, даштан болгаш ыяштан янзы-бүрү кылыглар кылыр талазы-биле хөй санныг мөөрейлерниң тиилекчилери.
Бо чылын "Көдээ өг-бүле" деп шаңналга Сүт-Хөл кожуундан Шолбан биле Шенне Монгуштарның өг-бүлези шылгараан. Ажыл-ишчи, үлегерлиг өг-бүле шээр малды өстүрүп, кожуун хемчеглеринде идепкейлиг киржип чоруур. Өг-бүле эът продукциязының бүдүрүлгезин ажыдарынга социал керээ-биле 2022 чылда күрүне деткимчезин алган.
Мөңгүн-Тайга кожуундан Алдын-Херел биле Айгуль Успуннарның өг-бүлези «Аныяк өг-бүле» номинацияга тиилээн. Өг-бүле кадык амыдыралды суртаалдап, спортчу болгаш ачы-буян хемчеглеринге идепкейлиг киржип чоруур. Алдын-Херел – шериг операциязының киржикчизи, спорттуң комплекстиг хевиринге болгаш кикбоксингке мастер, ажы-төлүнге көскү үлегер-чижек болуп чоруур.