Кадык амыдыралды чонга нептередиринче база долгандыр хүрээлелге багай салдарны эвээжедиринче угланган “Арыг агаарны шилип тур мен” деп бүгү-российжи акция езугаар май 17-де Кызыл хоорайга чиик атлетика чарыжы болуп эртер. Чадаг чарышка күзелдиг кижи бүрүзү киржип болур.
Тыва Республиканың спортчу хемчеглер эргелелиниң ВКонтакте социал четкиде арынынче runreg.ru/u.php?ul=8648 шөлүг-биле киргеш, хемчегже онлайн бүрүткелди эртип ап болур. Билдириишкиннерни май 16-да 16:00 шакка чедир хүлээр. Тывада регионалдыг Арга-арыг болгаш бойдус яамызы болгаш Спорт яамызының организастааны чадаг чарыштың киржикчилерин шаңналдар болгаш чиик-сергек сеткил-хөөн манап турар.
Советтиг Тываның 5 чылы аттыг стадионга киржикчилерниң чыылдазы болгаш чарыштың старты болур. Киржикчилерге дугаарларны 10:00 шакта үлээр, чарыш боду 10:20 шакта эгелээр. Чарыш Улуг-Хемниң эриинде Кадыкшылдың чадаг-терге оруун дургаар эрткеш, Кызылдың Аныяктар парыгынга төнер.
Киржикчилерни ийи хар-назынга чарган: 18 хардан 39 харга чедир эр болгаш херээжен улус (1986-2007 чылдарда төрүттүнген) база 40 хардан өрү назылыг эр болгаш херээжен улус (1985 чылда төрүттүнген болгаш оон-даа улуг). Шупту киржикчилер 2,5 километр хемчээлди маңнап эртер. Ийиги бөлүктүң чарыжы 10 шак 30 минута турда эгелээр.
Акция эгелээн хүнден эгелээш, төлевилелдиң аңгы-аңгы хевирлерге киржип болур. Чижээ, арыг агаарга селгүүстээн чуруктарыңарны, ол ышкаш спортчу чедиишкиннериңерни бижип, каш километр эрткенин айтып, ВКонтакте социал четкиге #выбираючистыйвоздух база #кызыл деп хештегтер-биле айтып бижиирин сүмелеп турар. Солун чуруктарның болгаш чогаадыкчы төөгүлерниң авторларын шаңналдар манап турар. Акцияның https://mnr-air.ru/challenge сайтызындан тодаргай медээни билип ап болур.
Чылдың-на эртип турар Бүгү-российжи акция «Экологтуг чаагай чорук» национал төлевилелдиң «Арыг агаар» федералдыг төлевилелиниң чонга билдингир шимчедикчизи апарып, кадык амыдыралды нептередиринче, ажыктыг эко-чаңчылдарны хевирлээринче угланган.
«Арыг агаар» федералдыг төлевилелде киржип турар хоорайлар база акцияда кирген. Кызыл хоорай бо төлевилелдиң 2022 чылда киржикчизи апарганын сагындыраал.
Акцияның түңнелдерин сентябрь 7-де, Москвага, көк дээрниң арыг агаарының бүгү делегей хүнүнде үндүрер. Тиилекчилерни уттундурбас суй-белектер-биле шаңнаар, а тускай чедиишкиннерни чедип алган эң идепкейлиг киржикчилер Россия Федерациязының Бойдус курлавырларының болгаш хүрээлел яамызының болгаш акцияның партнерларының үнелиг шаңналдарын алыр. 2024 чылда “Арыг агаарны шилип тур мен” деп Бүгү-россияның III акциязының тиилекчизи Челябинск хоорай болган.