Тываның Чазаа 2024 чылда уругларның болгаш ажы-төлдүг өг-бүлелерниң байдалының дугайында күрүне илеткелин сайгаргаш, бадылаан. Россияда Өг-бүле чылы кылдыр чарлаан бо чылда уругларны болгаш өг-бүлелерни деткииринче онза кичээнгей угланган.
ТР-ниң Күш-ажыл яамызының белеткээни илеткелде демография, ажы-төлдүг өг-бүлелерниң амыдыралының деңнели, оларның социал-экономиктиг байдалы, күрүне деткимчези, чурттаар оран-сава-биле хандырылга айтырыгларын киирген. Ие-чаштарның кадыкшыл байдалы, чемненилгези, өөредилгези, уруглар кижизидилгези болгаш сайзыралы, элээдилерни болгаш ада-иелерни ажылга хаара тудары, өг-бүледе таарымча чок байдалга болгаш социал өскүс чорукка удур профилактика, амыдыралдың берге байдалынга таварышкан уругларга дуза дугайында медээлер документиде кирген.
Тывада Өг-бүле чылында 1700 ажыг хемчеглер эрткен. Хөй ажы-төлдүг өг-бүлелерниң реестрин тургускан, оларга чаңгыс аайлаан болгаш электроннуг шынзыдылгаларны бээрин организастаан. Президентиниң чарлыы-биле «Ие маадыр» атты тывысканы – Тываның амгы төөгүзүнде бир дугаар болуушкун болган. Деткимче хемчеглеринче хөй ажы-төлдүг өг-бүлелерниң 6 харга чедир уругларын халас эмнер-биле хандырарын киирген. Ол ышкаш республикада хөй ажы-төлдүг өг-бүлелерниң чурттаар оран-сава төлевиринге чарыгдалдың айыттынган үстүкү хемчээлин 22-ден 15 хуу чедир эвээжеткен.
Бөгүн республикада 18 хар четпээн 122,3 муң ажыг чаштар болгаш элээдилер бар, азы чурттакчы чоннуң ниити санының 36,3 хуузу. 84219 уругга пособиени төлеп турар. 2024 чылда 38172 өг-бүле ону алган. Ниитизи-биле 11,47 млрд. рубльди ол сорулгаларже тускайлаан. Эрткен чылын 1965 өг-бүле, программа эгелээнден бээр 57,5 муң өг-бүле ие капиталының немелде дузазын алган. Оон аңгыда, 5 база оон хөй ажы-төлдүг 230 өг-бүле 63650 рубль түңнүг регионалдыг ие капиталын ажыглаан.
Республика ажы-төлдүг өг-бүлелерге саң-хөөге хамаарышпас дуза хемчеглериниң системазын сайзыраткан. Назы четпээн үш болгаш оон хөй ажы-төлдүг кижилерге чер база өнчү-хөреңги үндүрүглеринге чиигелделерни берип турар. 2023 чылда 15935 кижи чер үндүрүүнден, а 12934 кижи НДФЛ үндүрүүнден тырткан түңнү эгидип алган.
Тывада янзы-бүрү социал программалар хөй. 2024 чылда эвээш орулгалыг өг-бүлелер болгаш чааскаан чурттап турар хамаатылар-биле 3008 социал керээлерни чарган. 7436 өг-бүле деткимче кылдыр картошка үрезинин алган. 104 аныяк өг-бүле чуртталга байдалын экижиткен, 51 өг-бүлени эргижирээн бажыңнардан көжүрген, 154 өскүс уруглар квартираларын алган, 2172 өг-бүле чиигелделиг ипотеканы ажыглаан, 101 өг-бүле бажың тударынга чер участогун халас алыр эргезин ажыглаан.
120 ажыг арынныг илеткелде Тываның күүсекчи эрге-чагырга органнарының албан езузунуң медээлеринге даянган статистиктиг көргүзүглер кирген. Ону республика Чазааның албан езузунуң сайтызында база эрге-хоойлу медээлериниң www.pravo.gov.ru интернет-порталында ону долузу-биле салган.