Май 7-де Тыва Республиканың Чазааның Даргазының оралакчызы Уран-оол Ондарның удуртулгазы-биле республиканың конкурс комиссиязы «Агромотиватор» база «Агростартап» грант программаларынга киржир кордакчылар шилилгезиниң ийиги чадазын эрттирген.
Бо чылдан эгелеп көдээ ажыл-агый адырында сайгарлыкчы чорукту деткиириниң бо хевирлеринге көрдүнген акша-хөреңгиниң чамдыызын тускай шериг операциязының киржикчилеринге бээри көрдүнген. Комиссия кежигүннери 49 кордакчының төлевилелдерин сайгарган.
Конкурс төлевилелдерин сайгарып көөрүнге эксперттер кылдыр хөй-ниити организациялары - «Тыва Республиканың Ада-чурт дайынчыларының өг-бүлелер комитеди» АКхН, ТШО хоочуннарының ассоциациязы, «Кара ирбиш» Тыва Республиканың шериг албанныгларының регионалдыг хөй-ниити организациязының төлээлери киришкен.
Ийиги чадаже эрте берген 49 кордакчының 46-зы «Агростартап» грантызын алыр конкурска киришкен болза, а 3 кижи – «Агромотиватор» грантыже төлевилелдерин киирген. Кордакчыларның 13-ү – тускай шериг операциязының хоочуннары.
Конкурс киржикчилери боттарының төлевилелдерин таныштырып, комиссияның айтырыгларынга харыылаан. Төлевилелдерниң көвей кезии көдээ ажыл-агый техниказын садып алырынче, мыйыстыг бода мал азырап-өстүреринче, ол ышкаш сад ажылын эгелээринче угланган.
«Ада-чурт камгалакчылары» күрүне фондузунуң регионалдыг салбырының социал координаторлары конкурс киржикчилеринге чугула документилерни чыырынга дузалажып, арат-тараачын ажыл-агыйын чорударының эге билиглеринге тускай курстарны эрттирген.
ТШО киржикчилерин база оларның өг-бүле кежигүннерин деткиир хемчеглер санынче бо чылдың эгезинде Россияның Президентизи Владимир Путинниң инициативазы-биле «Агромотиватор» грантыны кииргенин сагындыраал. Эът болгаш сүт продукциязын бүдүреринге улуг мыйыстыг бода малды өстүрүп-азыраарынче көрдүнген грантының хемчээли 7 млн рубль, а өске угланыышкыннарже 5 млн рубль чеде бээр.
Апрельдиң 15-те «Агромотиватор» грантыже чагыглар хүлээп алыышкыны доозулган. Конкурс шилилдезиниң тиилекчилерин Тыва Республикада көдээ ажыл-агыйны хөгжүдер база көдээ ажыл-агый продукциязы, чиг эт болгаш аъш-чем рыноктарын чурумчудар күрүне программазы-биле деткиир. Конкурстуң негелдези-биле алырга, төлевилелди боттандырар өртек-үнениң 90 хире хуузун грант акшалары-биле дуглаар болза, арткан 10 хуузун грант алыкчызы боду киириштирер.
Көдээ ажыл-агый яамызы 2019 чылдан бээр «Агростартап» грантызы-биле агроүлетпүр комплекизиниң тус чер бараан бүдүрүкчүлерин деткип турар. Бо чылын агроүлетпүр адырынга бизнес ажыдар күзелдиг тускай шериг операциязының хоочуннарын деткиири-биле программаның акшаландырыышкынында аңгы хууну тускайлаан.
Көдээ ажыл-агый яамызы бо неделя төнчүзүнде конкурстуң тиилекчилерин чарлаар.
«Агромотиватор» биле «Агростартап» грант алыкчыларының даңзызын ведомствонуң сайтызынга база социал четкилерге парлаар.