Аныяктарның патриотчу кижизидилге системазының кол кезээ болур «Зарница 2.0» бүгү-российжи шериг-патриотчу оюннуң регионалдыг чадазынга белеткел ажылдары Тыва Республикада чоруп турар. Россияда аныяктарның кол шимчээшкиннери — «Баштайгыларның шимчээшкини» уруглар болгаш аныяктарның бүгү-российжи хөй-ниити күрүне шимчээшкини биле «Юнармия» бүгү-российжи элээди уругларның шериг-патриотчу хөй-ниити шимчээшкининиң регионалдыг салбыры ону организастаан.
Оргкомитеттиң дыңнадыы-биле алырга, февральдың 2-ден март 31-ге чедир шилилде хемчеглер 148 өөредилге албан черлерин, ооң иштинде ниити өөредилге школаларын, ортумак профессионал өөредилге черлерин хаара туткан. Үш аңгы бөлүкке чарган оюннарга ниитизи-биле 21089 уруг киришкен. Барыын-Хемчик, Чаа-Хөл база Таңды кожууннарның, ол ышкаш Кызыл хоорайның киржикчилери идепкейин көргүскен.
Тываның Чазааның Даргазының оралакчызы Орлан Сарыглар регионалдыг «Зарница 2.0» оюнну бедик деңнелге эрттирериниң чугулазын демдеглээн. Ук оюн аныяк салгалга төрээн чуртка ынакшылды, хамааты бот-тускайлаң чорукту база чурттуң эрткен төөгүзүнге хүндүткелди хевирлээр онзагай шөл болурун демдеглээн.
Майның 12-14-те оюннуң регионалдыг чадазы 55-ки аңгы гвардейжи мотоадыгжы бригаданың девискээринге болур. Оюннарга киржир 800 хире элээдилер болгаш студентилерни үш аңгы бөлүкке чарган.
Организастыг комитеттиң составынче яамылар, ведомстволар болгаш хөй-ниити организацияларының төлээлерин киирген. Аныяктарның патриотчу кижизидилге адырында салдынган сорулгаларны болгаш шиитпирлерни чедип алыр дээш «Зарницы 2.0» оюннуң регионалдыг чадазын эки болгаш шынарлыг эрттиреринге күжениишкиннерни каттыштырарын шупту киржикчилерге ол сүмелээн.