Тываның сугларынга биче судноларның эжиндириишкин сезону республикада ажыттынып турар. Россияның ОБЯ-ның Тыва Республика талазы-биле кол эргелелиниң начальнигиниң оралакчызы Валерий Шыырап республиканың Чазаанга аппарат хуралынга ооң дугайында дыңнаткан. Навигация сезону ноябрь 1-ге чедир уламчылаар.
Амгы үеде Россияның ОБЯ-ның Тыва Республика талазы-биле эргелелдиң биче суднолар талазы-биле күрүне инспекциязының ажылдакчылары БСКИ-де бүрүткеттинген биче судноларның хыналдазын чорудуп турар. Регионда сугже үндүреринге белен 2900 ажыг хемелер, оларның аразында моторлуг хемелер болгаш янзы-бүрү эштир чүүлдер бүрүткеттинген.
Эжиндириишкин сезонун ажыдар мурнунда, майның 13-те, биче суднолар талазы-биле күрүне инспекциязынга хамааржыр судноларның беленин республиканың суг объектилеринге хынаар. Ол суднолар суг объектилеринге биче судноларны ажыглаарының дүрүмнерин хажытпазын болдурбазынче угланган хайгаарал болгаш рейдилер чорударынга ажыглаттынып турар. Суг объектилеринге айыыл чок чорукту хандырар дээш дүрүмнерни сагыырының чугулазын специалистер онзалап демдеглээн.