2014 чылдың май 11 – Донбасска улуг төөгүлүг хүн. Ол хүн бүгү чоннуң референдуму аңаа болуп эрткен. Украинаның Донецк облазының чурттакчыларның көвей кезии бот-догуннаан күрүне тургузуу дээш бадылаан. Бо чылын Россия Федерациязының хамаатылары Донецк Улус Республиканың тургустунганының 11 чылын демдеглээн. Тыва Республика Россияның шупту субъектилери-биле деңге ДУР-га деткимчени көргүзүп, тыва шериг албанныглар республиканың чурттакчылыг черлерин камгалаар дээш тускай шериг оперециязында киржип турар.
Тываның Баштыңы Владислав Ховалыг апрель төнчүзүнде Донецк Улус Республикага ажыл-албан аайы-биле чорааш, ДУР-нуң Баштыңы Денис Пушилинге ужуражырга, Тываның чонунга четтиргенин илереткен сөстерни дамчыткан. Оларның регионун камгалаарынга тыва шериг албанныгларның киржилгезин үнелеп, ДУР-га база дайнычыларга гуманитарлыг чүъктерни чыырынга Тываның чурттакчыларының улуг үлүүн ол онзалап демдеглээн.
Денис Пушилин Донецк Улус Республиканың девискээринге ТШО даалгаларын күүседип тура маадырлыы-биле мөчээн тыва дайынчыларга күрүне шаңналдарын Владислав Ховалыгга дамчыткан.
Донецк Улус Республиканың Баштыңының чарлыы-биле, тулчуушкуннар үезинде көргүскен эрес-дидим болгаш коргуш чок, маадырлыг чоруу база ДУР-нуң база ооң чонунуң мурнунга ачы-хавыяазы дээш, Маадыр аттарны Төп шериг округунуң 41-ги гвардейжи ниити шериг армиязының 55-ки аңгы гвардейжи мотоадыгжы (дагжы) бригаданың рота командириниң шериг-патриотчу ажыл талазы-биле оралакчызы – гвардияның лейтенантызы Айдың Демир-оолович Норбуга база радиостанция радиотелеграфизи – гвардияның дайынчызы Чолдуг Калин-оолович Соянга тывыскан.
В. Көк-оол аттыг Национал хөгжүм-шии театрынга май 8-те эрткен байырлыг хурал үезинде маадырларның чоок улузунга шаңналдарны байырлыы-биле тывыскан.
Тыва Республиканың эмчилери 2022 чылдың декабрьда ДУР-га дузалажып, дайынчы тулчуушкуннарда балыгланганнарга ачы-дузазын көргүскеннер. Тывадан волонтерлар изиг тулчуушкуннар чоруп турган Горловка база Светлодарскыда когарааннарга дузаны коргуш чок көргүскеннер.
Донецк Улус Республиканың хүнүнде регионнуң Баштыңы Денис Пушилин социал четкилер таварыштыр чаңгыс чер чурттугларынга байырын чедирген: «Бөгүн Республикавыстың төрүттүнген хүнүн 11 дугаар чыл демдеглеп турар бис. Маадырларның чурту, Россияның составында, бажыңывыста – үш дугаар чыл. Шахтерларның, металлургтарның, таараажыларның, шынчы болгаш тургузукчу ажылчын кижилериниң чурту. 130 аңгы чоннарның культуразын болгаш ужур-чаңчылдарын каттыштырган чер. Ол — Донецк Улус Республика-дыр. Чоргаар. Күштүг. Дидим. Бистиң. Байырлал-биле, эргим чяаңгыс чер чурттуглар!».
ДУР-га Республика хүнүнде байырлыг митингилер болгаш концерттер эртип, тураскаалдарга чечектерни салган.