Республика Баштыңы Владислав Ховалыгның даалгазы езугаар, Москвада Тыва Республиканың бүрүн эргелиг төлээзиниң ажылдакчылары Улуг Тиилелгениң 80 чылының бүдүүзүнде чугула ажылды уламчылап – эмнелгелерже чедип, кел чыдар байырлал-биле дайынчыларга байырны чедирип турар.
Тыва Республиканың Чазааның Даргазының оралакчызы – Тыва Республиканың Москвада бүрүн эргелиг төлээзи Чечен Чоксумнуң удуртканы делегация Тывадан шериг албанныгларның эмнедип чыдары Москваның “Вороновское” эмнелгезинге чораан. Төлээ чериниң ажылдакчылары ол чорааш дайынчыларга белектерни, бажыңга кылган тыва аъш-чемни дамчыдып, кел чыдар Тиилелге хүнү-биле байырны чедиргеннер. Бо ужуражылга төрээн черинден ыракта дайынчыларывыска улуг деткимче болган.
Эрзин кожуундан «Эзир-Уя» улусчу ансамбльдиң күүселдези онза өөрүшкүнү болдурган. Москвага «Маадырлар чурту» деп гала-концертке киржир дээш келген артистер эмнелгеге барып, маргылдаалап келген мөгелерни боттарының күүселдези-биле деткээннер. Шак ындыг сагыш човаашкын хей-аътты көдүрүп, сүлде-күжүнге бүзүрелди оттурарынга дузалаар деп, оолдар чугаалаан.
Тываның бүрүн эргелиг төлээ чериниң ажылдакчылары эмнелгелерде шериг албанныгларны база эмчилерни база өөрткен. Дайынчыларның кадыкшылы дээш ажылдап турар эмчилер коллективинге кызымак күш-ажылы дээш четтиргенин илередип, кел чыдар байырлал-биле байырны чедирген.
Тываның Кадык камгалал яамызының, Күш-ажыл болгаш социал политика яамызының база Саналга палатазының коллективтеринден чоруткан белектерни дайынчыларга болгаш эмчилерге дамчыткан. Бо болуушкун бистиң камглакчыларывыс болгаш оларны эмнеп турар кижилер-биле харылзааны тударынга идиглиг. Ынчангаш Улуг Тиилелгениң болгаш бо хүнде бистиң чуртувусту камгалап турар маадырларны алгап-мактаарын уламчылаар бис.
Москвада Тываның бүрүн эргелиг төлээ чери ТШО киржикчилеринге болгаш оларның өг-бүлелеринге, ол ышкаш Тываның Кадак камгалал яамызының бижии-биле Москва хоорайның болгаш Москва облазының эмнелгелеринге эмнедир дээш келген чаңгыс чер чурттугларны хостелге халас чыттырар деткимчени көргүзүп турар. Хостелге чыдарының чурумун ажыл шагында бо дугаардан +7(499)236-48-01 азы албан езунуң бо https://vk.com/wall-132363710_3631 шөлүүнден билип ап болур.