Тыва Арат Республикадан фронтуже аъттанган Ада-чурттуң Улуг дайынының киржикчилериниң дугайында ийи томнуг “Сактыышкын номун” уламчылаан «Тиилелгелиг чанып келгеннер! Тыва» деп номнуң таныштырылгазы болуп эрткен. Чаа үндүрүлгениң ачызында 2045 фронтучунуң аттарынга немей ийи муң хире дайын хоочуннарының даңзызы ынаар кирген.
Республиканың Баштыңы Владислав Ховалыг номнуң таныштырылгазынга киришкеш, профессор Николай Моллеровтуң удуртканы Тываның гуманитарлыг болгаш тускай социал-экономиктиг шинчилелдер институдундан ажылдакчылар бөлүүнге дайынның киржикчилериниң дугайында медээлерни чыып, хынаар узун болгаш чымыштыг ажылды чорутканы дээш, ол өөрүп четтиргенин илереткен.
«Тургузукчулар-биле каш-даа ужурашкан бис. Ооң мурнунда томнар дайын шөлдеринге чок болган чаңгыс чер-чурттугларга тураскааттынган. Чаа номда фронтудан ээп келгеннерниң төөгүзүн бир дугаар чугаалап турар. Чаңгыс чер-чурттугларывыстың дайынчы оруктарын, маадырлыг чоруктарын чүгле номчуур эвес, а оларның салым-чолу амыр-тайбың үеде канчаар өскерилгенин билип азы база катап сактып болур» - деп, Владислав Ховалыг бодунуң блогунда номга хамаарыштыр сагыш-сеткилин үлешкен.
Кызылда Тиилелге тураскаалының маны ханаларында мөңгежиткен Ада-чурттуң Улуг дайынының киржикчилериниң даңзызын эртемденнерниң чыгган материалдарынга даянып, немей сиилбээнин республика Баштыңы дыңнаткан. Ынчангаш шөлде мемориал комплекизин эде чаартып, «Тиилелгелиг чанып келгеннер!» деп немелде хананы тургускан.
Владислав Ховалыг Ада-чурттуң камгалакчыларының сактыышкын тураскаалды кадагалап арттырар ажыл ам-даа уламчылаар дээрзин таныштырылганың киржикчилеринге чугаалаан. Ылаңгыя ССРЭ-ниң өске регионнарындан шериг албанынче кыйгырткан, ынчалза-даа дайын соонда Тывага келген хоочуннарның аттарын Тиилелге тураскаалының даңзызынче киирер ужурлуг. Ол ышкаш девискээр дайыннарының болгаш тускай шериг операциязының киржикчилериниң аттарын тураскаалче немээр херек деп, республика Баштыңы саналдаан.
"Тиилелгелиг чанып келгеннер! Тыва" деп ном 500 санныг парлаттынган. Чоокку үеде ону ном саңнарындан болгаш республиканың Национал архивинден тып, ооң-биле таныжып болур.