Ада-чурттуң Улуг дайынынга Тиилелге хүнүнүң 80 чыл оюн демдеглээри Тываның чурттакчыларынга онзагай эртер ужурлуг: элээн каш чылдарда үзүктелген соонда «Өлүм чок полктуң» улуг чыскаалы республикага ам база катап болуп эртер. Тываның Баштыңы Владислав Ховалыг хөйнүң киржилгези-биле акцияны катап эгелээрин саналдаан.
Владислав Ховалыг регионнуң чурттакчыларынга кыйгырыында чоокшулап орар болуушкуннуң чугулазын онзалап демдеглээн: «Бо чылын Тыва «Өлүм чок полк» деп акцияны катап эгелээр. Чыскаал каш чылдарда дыштанган соонда, май 9-та Кызылга база катап болур».
Республика Баштыңы «Өлүм чок полктуң» бо чыскаалы өгбелерниң маадырлыг чоруктарынга хүндүткелдиң болгаш чоннуң чаңгыс деминиң демдээ болур деп демдеглээн. Сактыышкын хемчеглерге чүгле Ада-чурттуң Улуг дайынының дайынчыларының салгалдары эвес, а тус чер дайынчы хөделиишкиннер киржикчилериниң, ол ышкаш тускай шериг операциязының дайынчыларының төрелдери киржир.
Владислав Ховалыг акцияга идепкейлиг киржиринче республиканың чурттакчыларын кыйгырган: «Ада-чурттуң Улуг дайынынга тулчуп чораан республикавыстан адаларның, кырган-ачаларның болгаш өгбелерниң, ол ышкаш тылдың ишчилериниң – кижи бүрүзүнүң үлүг-хуузунга алдар-хүндүнүң төөгүзү-дүр. Маадырларыңарның чуруктарын эккеп, ажы-төлүңерге, уйнуктарыңарга оларның эрес-дидим чоруктарының дугайында чугаалап бериңер".
«Өлүм чок полк» чаңчылчаан акцияның хемчеглери массалыг чыскаал ышкаш, онлайн хевирге болур. Онлайн хемчегге киржир дизе, маадырның чуруун 2025.polkrf.ru деп сайтче азы ВКонтактыда clck.ru/UVgLy болгаш Одноклассникиде clck.ru/UvjyH капсырылгаже май 6-ның кежээзинге чедир киирери чугула. «Өлүм чок полкка» Ада-чурттуң Улуг дайынының хоочуннары, тылдың ишчилери, дайын чылдарының ажы-төлү база киржип болур. Кожар чуруктарының шынарын экижидип, өңүн өскертип болур.
Онлайн чыскаалдың дорт дамчыдылгазындан Ада-чурттуң Улуг дайынының дугайында төөгүлүг болуушкуннарның, ол ышкаш шеригниң аңгы-аңгы адырларының, дайынчы тулчуушкуннарга киржилгезиниң дугайында таныжар арга бар. Көрүкчүлер канчаар көөрүн боттары шилип алыр: маадырларның аңгы чыскаалдарын азы ниити чыскаалды көөр арга бар.
«Салгал-биле харылзажыңар» деп харылзаа хевири «Өлүм чок полк» деп онлайн-шөлде чаа арга: чыскаалдың маадырларының төлээлеринден оларның дугайында немелде барымдааларны алыр дээш, ынаар дыңнадыгны чорудуп болур.
2012 чылдан бээр Россияда «Өлүм чок полк» деп чоннуң хөй-ниити акциязын эрттирип турар. 2025 чылда ол холушкак хевирге эртер: 57 регионга чаңчылчаан чыскаалдарны организастаар болза, чамдык регионнарга айыыл чок чорукту хандырары-биле онлайн хевирге эртер.