Тывада өртке удур онза чурумну узаткан – майның 6-дан 26-га чедир регионда ол күштүг болур. Тыва Республиканың Чазааның ээлчеглиг хуралында аңаа хамаарышкан шиитпир хүлээп алдынган.
Тываның Баштыңы Владислав Ховалыг социал четкилерде бодунуң блогунда хүлээп алдынган доктаал арга-арыг девискээрлеринче хамаатыларның кирерин кызыгаарлап турарын тайылбырлаан. Өртке удур айыыл чок чоруктуң онза байдалдарында арга-арыгже чүгле тускай чөпшээрелди Арга-арыг яамызындан болгаш кожууннуң арга-арыг ажыл-агыйларындан ап болур.
Владислав Ховалыгның май байырлалдарының бүдүүзүнде регионнуң чурттакчыларынга кыйгырыында арга-арыгны камнаар, регионнуң онзагай бойдузун кадагалап арттырарының чугулазын онзалап демдеглээн. «Өгбелеривистиң бойдуска камныг хамаарылгазындан биске мындыг онзагай, чараш чер кадагалаттынып арткан. Ынчангаш харыысалгалыг болгаш кичээнгейлиг болуулуңар» – деп, Баштың кыйгырган. Ол ышкаш арга-арыг өрттериниң 78 хуузу кижиниң хайы-биле болуп турарын демдеглээн.
Оперативтиг албан черлериниң дыңнатканы-биле алырга, амгы үеде Тыва Республикада хову азы арга-арыг өрттери бүрүткеттинмээн. Республика девискээрлериниң көвей кезиинге болган чаъс-чайык, өл хар дүшкени аңаа салдарлыг болган. 2025 чылдың өрт айыылының сезону эгелээнден, Тывада ниитизи-биле 38 арга-арыг өрттери үнген, тайгада 396,6 га шөлдү шыва алган. 2024 чылдың ол-ла хүнүнде республиканың арга-арыг фондузунуң черлеринде 8 арга-арыг өрттери бүрүткеттинген, оларның ниити шөлү 157,2 га турганын деңнеп болур. Ынчалдыр өрттерниң саны 30 сан көвүдеп, ооң шөлү 51 катап көвүдээн.
Тыва Республиканың арга-арыг фондузунуң черлеринде өрт сезону 2025 чылдың март 31-де албан езузу-биле чарлаттынган дээрзин сагындыраал. Республика Баштыңы өрт айыылының берге байдалын көргеш, апрельдиң 15-тен май 5-ке чедир хамаатыларның арга-арыгже кирерин бүрүнү-биле хоруурун көрген өртке удур айыыл чок чоруктуң онза чурумун киирген турган. Таңды кожуунда улуг өрт чурттакчылыг черлерге айыылды тургузуп болурун көргеш, апрель айда муниципалдыг арга-арыгларга онза байдалды чарлаан турган.
Өрт айыылының сезону эгелээнден бээр, РФ-тиң административтиг корум-чурум үүлгедиишкиннериниң дугайында хоойлунуң 8.32 чүүлүнге дүүштүр чурум хажыдыкчыларынга хамаарыштыр 4 протоколду тургускан. Иштики херектер органнарынче, Россияның Онза байдалдар яамызының Тыва Республикада кол эргелелиниң хайгаарал болгаш профилактика ажылының территориалдыг кезээниң эргелелинче арга-арыг өрттериниң үнгенинге буруулуг кижилерни илередир дугайында 38 билдириишкин кирген.