2025 чылдың апрель 28-тен май 2-ге чедир чурттуң кол делгелге шөлү – Улус ажыл-агыйының чедиишкиннери делгелгезинге (ВДНХ) Россияның үндезин чоннарының культуразынга болгаш ус-шеверлеринге тураскааткан «Соңгу чүктүң эртинелери. Россияның мастерлери болгаш чурукчулары-2025» деп ХХ юбилейлиг делегей чергелиг делгелгеге Тыва Республикадан чогаадыкчы делегация киришкен.
Тываның бурунгу ус-шеверлелиниң үндезин чаңчылдары-биле сырый холбаалыг бедик профессионал уран чүүлдү көргүзүп, бойдус материалдарындан сиилбикчи, бедик мергежилдиг мастерлер бистиң республикавысты төлээлээн. Бурунгу чаңчылдарны болгаш чаа технологияларны чедиишкинниг каттыштырып, этно болгаш амгы үениң идик-хевин даарап чоруур специалистерниң ажылынга аңгы делгелгени тускайлап, кылыг бүрүзү чүгле практиктиг эвес, а чоннуң төөгүзүн тодаргай дамчыдып турар культурлуг ужур-утканы илереткен.
Делгелгениң аңгы булуңунга Тыва Республиканың Тожу тываларның «Тос-Бөрү» үндезин чоннар каттыжыышкынының президентизи Дорж Никитинниң болгаш арга-дуржулгалыг мастер Аракчаа Очурнуң деткимчези-биле Сибирьниң үндезин чурттакчылары – Тожу тываларының «Хайыракан» ниитилежилгези национал аъш-чемнерни таныштырган. Аалчылар чаңчылчаан рецептилер ёзугаар белеткээн ёзулуг национал чемнерниң хөй хевирлери-биле таныжар аргалыг берген.
Тыва мастерлер улуг хемчээлдиг делгелгеге киришкеш, боттарының онзагай уран чүүлүнче кичээнгейни хаара тудуп, өске регионнарның төлээлери-биле харылзааны тургузуп, культуразын таныштырбышаан республиканың турисчи арга-шинээн көргүзер аргалыг болган. Бистиң регионнуң профессионал ус-шеверлериниң продукциязын мындыг деңнелдиг культура шуулганнарынга таныштырары Тываның уран чүүлүнүң болгаш чаңчылдарының дугайында билиглерни бедидер, орус-даа, даштыкы-даа аалчыларның регионга сонуургалын оттурар.