Частың болгаш Күш-ажылдың байырлалынга тураскааткан күрүне шаңналдарын тыпсырының байырлыг езулалы Тываның Чазаанга болуп эрткен. Төрээн чериниң болгаш чуртунуң хөгжүлдезинге улуг үлүг-хуузун киирген чурттакчыларга Тыва Республиканың күрүне шаңналдарын болгаш хүндүлүг аттарын тывыскан. Республика Баштыңы Владислав Ховалыг база Тыва Республиканың Дээди Хуралының (парламентизиниң) даргазы Каң-оол Даваа чаңгыс чер чурттугларга шаңналдарны тывыскан.
Тываның Баштыңы Владислав Ховалыг бистиң чуртта Май 1-ни демдеглээриниң онзагай ужур-утказын болгаш чаңчылдарын байыр чедириишкининде демдеглээн:
- Бистиң чуртта Май 1 байырлалының ады үениң аайы-биле аңгы-аңгы адап турган. Ынчалза-даа, чогаадыкчы күш-ажылга хүндүткелдиң демдээ болур «Күш-ажыл» деп сөс ында кезээде бар. Ол кижи бүрүзүнге, ниитилелге, чуртка хүндүткелдиг болгаш чугула черде. Россияның хөй националдыг чонунуң үндезин үнелели-дир. Ынчангаш Май 1 – Частың болгаш Күш-ажылдың байырлалының бүдүүзүнде республиканың ажыл-ишчилеринге мөгейип, күрүне шаңналдарын тыпсыр байырлыг езулалды эрттирип турарывыс ол.
Республика Баштыңы күрүне шаңналдарын тыпсыр езулалды эгелеп тура, Частың болгаш Күш-ажылдың байырлалының бүдүүзүнде ат-алдары чонга билдингир, республиканың хөгжүлдезинге күш-ажылчы үлүг-хуузун киирген чаңгыс чер-чурттугларын хүндүлеп турарын онзалап демдеглээн. Оларның аразында эртемденнер болгаш башкылар, эмчилер болгаш чемпионнарның дагдыныкчылары, культура адырының төлээлери, тудугжулар болгаш аңгы-аңгы адырларның хоочуннары бар:
- Төрээн Тывавыстың хөгжүлдезинге силерниң кижи бүрүзүнүң күш-ажылы чугула – деп, Владислав Ховалыг чугаалаан.
Күш-ажылчы чедиишкиннери база хөй чылдарда ак сеткилдиг күш-ажылы дээш Тываның Баштыңының Хүндүлел бижиин «Тываның авиация шугумнары» республиканың казна бүдүрүлгезиниң бүдүрүлге-диспетчер салбырының удуртукчу инженери Андрей Эдуардович Бандеевке тывыскан.
Чуртталга-коммунал ажыл-агый адырынга хөй чылдарда ак сеткилдиг ажылы дээш «ССРЭ-ниң составынче Тыва Арат Республиканың эки тура-биле каттышкынының 80 чыл ою» деп Тыва Республиканың юбилейлиг медалы-биле «Водоканал-Сервис» КХН-ниң арыглаашкын объектилериниң 3-кү разрядтың оператору Ярослав Ярославович Половковичини шаңнаан.
Культура адырында хөй чылдарда база ак сеткилдиг ажалы дээш «Тыва Республиканың культуразының алдарлыг ажылдакчызы» атты В.Л. Эренчин аттыг Эрзин кожууннуң төп библиотека системазының салбыр эргелекчизи Руслана Сояновна Тарначыга тывыскан.
Өөредилге адырында ачы-хавыяазы болгаш хөй чылдарда ак сеткилдиг ажылы дээш «Тыва Республиканың өөредилгезиниң алдарлыг ажылдакчызы» хүндүлүг атты Чөөн-Хемчик кожууннуң Чадаана хоорайның «Хээлер» уруглар садының эргелекчизи Ховалыг Ульяна Шыыраповна Ховалыгга тывыскан.
Кадык камгалалының хөгжүлдезинге киирген үлүг-хуузу болгаш хөй чылдарда ак сеткилдиг ажылы дээш «Тыва Республиканың кадык камгалалының алдарлыг ажылдакчызы» хүндүлүг атты «Серебрянка» санаторий-профилакторийниң кол эмчизи Оксана Ивановна Гостюхинага тывыскан.
- Амгы үеде бар чүүлдеримни үнелеп, ынак, хүндүлеп чоруур кылдыр өөредип кааны дээш ада-иемге четтиргеним илередир-дир мен. Чурттакчы чоннуң кадыкшылы дээш кады ажылдап чораан болгаш ам-даа ажылдап чоруур коллегаларымга, чаңгыс үзел-бодалдыг кижилеримге өөрүп четтирдим. Бистиң албан ажылывыска улуг деткимчеңер дээш Кадык камгалал яамызынга өөрүп четтирдим. Бистиң санаторийивис 2023-2024 чылдарда Россияның эң эки санаторийлериниң санынче кирген. Тускай шериг операциязының киржикчилерин реабилитациялаар дээн ышкаш, бистиң албан чериниң мурнунда тургустунган шупту сорулгаларны күүседир дээш кызымак ажылдаарын аазап тур мен – деп, Оксана Ивановна чугаалаан.
Хөй чылдарда ак сеткилдиг күш-ажылы дээш «Тыва Республиканың Улустуң мастери» хүндүлүг атты культураның хоочуну Донгак Клара Александровнага тывыскан.
Өзүп орар салгалдың кижизидилгезинге улуг үлүг-хуузу болгаш хөй чылдарда ак сеткилдиг күш-ажылы дээш “Тыва Республиканың Улустуң башкызы” хүндүлүг атты өөредилгениң хоочуну Шыдар Шыыраповна Конгарга тывыскан.
Культураның хөгжүлдезинге улуг үлүг-хуузу болгаш хөй чылдарда ак сеткилдиг күш-ажылы дээш культураның хоочуну Сергей Иванович Бадыраны “Тыва Республикага ачы-хавыяазы дээш” деп Тыва Республиканың медалы-биле шаңнаан.
Культураның хөгжүлдезинге улуг үлүг-хуузу болгаш хөй чылдарда ак сеткилдиг ажылы дээш, “Хөөмей” делегей академиязының эртем-шинчилел салбырының эргелекчизи – кол эртем ажылдакчызы Зоя Кыргысовна Кыргысты «Буян-Бадыргы» орденниң 3-кү чадазы-биле шаңнаан.
Зоя Кыргысовна бо чылын 80 харлаан юбилейин демдеглеп турар. Улуг Тиилелгениң 80 чылын демдеглээн юбилейлиг чылда ооң хөй чылдарда күш-ажылын демдеглеп турарынга өөрүп турарын эртемден демдеглээн.
– Тиилелгени чоокшуладырынга ада-ием үлүг-хуузун кииргеннер. Олар шупту мал-маганын фронтунуң хереглелдеринче дамчыдып бергеннер. Ынчангаш бо чылын ындыг шаңналды алганымга онза өөрүп тур мен» - деп, Зоя Кыргысовна чугаалаан.
Тыва Республиканың Чазааның Аппарат болгаш Тыва Республиканың Баштыңының Администрация даргазы Юрий Юрьевич Ананьинни хөй чылдарда ак сеткилдиг күш-ажылы дээш «Шылгараңгай күш-ажылы дээш» деп Тыва Республиканың медалы-биле шаңнаан.