Частың болгаш Күш-ажылдың байырлалы – Май 1-ниң бүдүүзүнде, төрээн чериниң болгаш чуртунуң хөгжүлдезинге улуг үлүг-хуузун киирген Тываның чурттакчыларынга Россия Федерациязының Президентизиниң, Россия Федерациязының камгалал сайыдының шаңналдарын, хүндүлүг аттарны тывыскан. Республиканың баштыңы Владислав Ховалыг күрүне шаңналдарын тывыскан.
Республика Баштыңы шаңналдарны тыпсыр езулалды ажыдып тура, Тиилелгениң 80 чыл оюн демдеглээн чылда, күжүн харамнанмайн ажылдап, фашизмге удур Тиилелгени чоокшуладып келген тылдың ишчилеринге чаңгыс чер-чурттуглары мөгейип турарын демдеглээн. Амгы салгал республиканың хөгжүлдезиниң үндезинин тургускан хоочуннарның кызымак күш-ажылын өөрүп четтириишкин-биле сактып чоруур.
Ада-чурт камгалакчызының чылында амгы үеде Тиилелгени чоокшуладып чоруур Тываның ишчилериниң улуг үлүг-хуузун демдеглээри чугула деп, Баштың онзалап демдеглээн. Тускай шериг операциязының девискээринде Төрээн чуртунуң кызыгаарларын камгалап чоруур чаңгыс чер-чурттугларынга, ол ышкаш Россияның чаа регионнарының чурттакчыларынга республика чурттакчыларының деткимчези дыка улуг. Владислав Ховалыг ДУР-ге болгаш ЛУР-же сургакчылаашкынының үезинде Донбасстың шериг албанныглары болгаш чурттакчылары республиканың чурттакчыларынга алган дузазы дээш өөрүп четтиргениниң болгаш өөрүп четтиргениниң сеткилинден сөстерин дамчытканын дыңнаткан.
Социал ужур-уткалыг хемчеглерни белеткеп эрттиреринге идепкейлиг киржилгези дээш, Россия Федерациязының Президентизиниң Өөрүп четтириишкинин Тыва Республиканың Спорт яамызының «Олимп» олимпийжи курлавырының спортчу школазының директору Владимир Хуракович Түлүшке, В. Көк-оол аттыг Тыва Республиканың Национал хөгжүм театрының директору Саян Оюн-оолович Монгушка чарлаан.
Саян Оюн-оолович чурттуң Президентизиниң Өөрүп четтиргенин алганы аңаа улуг алдар-дыр деп демдеглээн. Ону деткээн кижи бүрүзүнге өөрүп четтиргенин илереткен:
- Бүзүрелиңер болгаш деткимчеңер дээш шуптуңарга четтирдим. Тываның болгаш Россияның чаагай чоруу дээш бараан болуп турарымга өөрүп тур мен – деп, ол чугаалаан.
Кадык камгалалының адырында ачы-хавыяазы болгаш хөй чылдарда ак сеткилдиг ажылы дээш Россия Федерациязының Президентизиниң Өөрүп четтириишинин республиканың Уругларның катап тургузуушкун медициназы болгаш реабилитация төвүнүң салбыр эргелекчизи Сергек Орланович Сатка чарлаан.
Ада-чуртуң культуразын болгаш уран чүүлүн хөгжүдеринге ачы-хавыяазы, хөй чылдарда үре-түңнелдиг ажыл-чорудулгазы дээш Россия Федерациязының Президентизиниң Өөрүп четтириишкинин чурукчу, “Россияның Чурукчулар эвилели” “Тыва Республиканың Чурукчуларының эвилели” деп бүгү-российжи чогаадыкчы хөй-ниити организациязының Тыва регион салбырының кежигүнү Шой Улзайович Чурукка чарлаан.
Кадык камгалалының адырында ачы-хавыяазы болгаш хөй чылдарда ак сеткилдиг ажылы дээш “Россия Федерациязының алдарлыг эмчизи” хүндүлүг атты республиканың СПИД болгаш халдавырлыг аарыгларның профилактика болгаш демисел төвүнүң иммунопрофилактика болгаш вирустуг гепатит салбырының начальниги Наталья Доржуевна Ооржакка тывыскан.
Россия Федерациязының камгалал сайыдының дужаалы-биле шериг кады ажылдажылганы болгаш дайынчы эштежилгени быжыглаарынга хууда улуг үлүг-хуузу дээш «Дайынчы эштежилгени быжыглааны дээш» деп медаль-биле дараазында кижилерни шаңнаан: «Восток» КХН-ниң чиңгине директору Сергей Васильевич Уюсовтң, «Элита» КХН-ниң директору Ваан Геворкович Андрасянны, «Деткимче» регионалдыг фондунуң директору Артыш Васильевич Иргитти база «Бастион» тускай тудуг чериниң чиңгине директорунуң оралакчызы Сергей Викторович Богусовту шаңнаан.