Республика Баштыңы Владислав Ховалыг чедери берге Мөңгүн-Тайга кожууннуң Мугур-Аксы суурда «Чечек» уруглар садында улуг септелге ажылдары чоруп турарын бодунуң блогунда дыңнаткан. Россия Федерациязының Президентизиниң эгелээни «Өг-бүле» деп чаа национал төлевилел күүселдези-биле ажылды эгелээн. Бо чылын чаа национал төлевилел езугаар республикада 9 өөредилге объектилерин чаартыр. Владимир Путинниң саналы-биле, капиталдыг септелгениң федералдыг программазынче өөредилге черлери болур уруглар садтары болгаш колледжтерни бир дугаар киирген.
– Тудугда чазып, бузар ажылдар доозулган. Амгы үеде кырын болгаш дээвиирлерин чартып кылып турар. Иштики өрээлдер шуут өскерли бээр. Уруглар садын чаагайжыткаш, соңгаларын, эжиктерин, даштын бүрүнү-биле солуур. Тудуг материалдары бар, оларны доктаамал чедирип турар. Август айдан эгелеп чаарттынган уруглар сады чаштарны хүлээп эгелээрин планнаан бис – деп, Владислав Ховалыг бодунуң блогунда бижээн.
70 чылдың нүүрүн көре берген уруглар садының оран-савазын бүрүнү-биле чаартыптары башкыларны болгаш чаштарның ада-иелерин аажок өөрткен. Школа назыны четпээн өөредилге албан черинде 80 уруг кээп турар. Мооң мурнунда тудуп дооскан ийиги оран-савага уругларны хүлээп, өөредилге ажылын уламчылаар.
Республиканың Өөредилге яамызы бо чылын «Аныяктар болгаш уруглар» национал төлевилелдиң «Уругларга бүгү-ле экини» база «Профессионалитет» федералдыг төлевилелдериниң күүселдези-биле Тывада 6 – Сукпак, Бора-Тайга, Кызыл-Даг, Аксы-Барлык, Чыргаланды, Хову-Аксы суурларда школаларны, ол ышкаш Тываның агроүлетпүр техникумун бүрүнү-биле септеп чаартырын сагындырган. Айыттынган черлерде септелге ажылдары апрельдиң 1-де эгелээн.
Тываның Өөредилге яамызының ажыл-чорудулгазын хандырар тускай төптүң специалистерин объекти бүрүзүнге харыысалгалыг кылдыр томуйлаан, олар ажылдың чорудуун хүннүң-не хайгаарап турар деп, ведомство демдеглээн. Өөредилге сайыдының хүлээлгезин күүседип турар Ренат Ооржак ажылдың чорудуун болгаш шынарын бодунуң хууда контролюнда алган.