«Тыва Республиканың муниципалдыг тургузуглар чөвүлели» ассоциацияның хуралынга «Тыва Республиканың муниципалдыг албанының тергиин ажылдакчызы» мөөрейниң түңнелдерин үндүрген. Тыва Республиканың Чазаанга мөөрейниң тиилекчилерин илереткен байырлыг хемчег болуп эрткен.
Тыва Республиканың муниципалдыг тургузуглар чөвүлели ассоциацияның удуртукчузу, Кызыл хоорайның баштыңы Ирина Казанцева ужуражылганы ажыткан. Республиканың Чазак Даргазының оралакчызының хүлээлгезин күүседип турар Айдыс Сынаа Тываның Чазааның өмүнээзинден, регионнуң Дээди Хуралының (парламентизиниң) Конститусчу-эрге-хоойлу политиказының болгаш тус чер бот-башкарылга талазы-биле комитеттиң даргазы Людмила Осмоловская чыылганнарга байырны чедирген.
Чоокта чаа Москвага болуп эрткен Бүгү-россияның тус чер бот-башкарылгазының II шуулганынга «Бараан болуру» муниципалдыг шаңналдың түңнелдерин үндүргенин, аңаа киржип чораанының дугайында Ирина Казанцева ужуражылгаже чалаан коллегаларынга чугаалаан. Мөөрейге Тывадан 130 ажыг билдириишкин киргенин сагындыраал. Таңды кожууннуң «Челээш» элээдилер төвүнүң башкызы Тамара Иргиттиң «Мээң өг-бүлемниң чаңчылдары» деп төлевилели Россияда эң эки 100 төлевилелдер санынче кирген. Президент Владимир Путин тиилекчилерни шаңнаар езулалга киришкен. Муниципалдыг деңнелге ажылдың чугулазын ол демдеглеп, ону күрүнеге болгаш ниитилелге эң-не улуг харыысалга, езулуг хүлээлге деп айыткан.
Тываның муниципалдыг ажылдакчыларының аразынга эрткен мөөрейниң түңнелинде, аңгы-аңгы номинацияларга чеди тиилекчини тодараткан. Бо чылын Өвүр кожууннуң специалистери эки көргүзүглерни көргүзүп, элээн каш номинацияларга шаңналдарны чаалап алган.
«Муниципалдыг башкарылга болгаш чурттакчы чоннуң хамааты эгелээшкиннерин хөгжүдери» номинацияда шупту үшту олутту ол муниципалдыг тургузугдан специалистер: Өвүр кожууннуң баштыңы-Төлээлекчилер хуралының даргазы Анай-Хаак Лопсан-Серен тергиин тиилекчи болган болза, ийиги черни ооң коллегазы, Өвүр кожуун чагыргазының экономика болгаш инвестиция политиказының талазы-биле оралакчызы Ай-кыс Донгак, үшкүзүн – Төлээлекчилер хуралының даргазының оралакчызы Аялга Чымба аразында үлешкен.
«Социал хөгжүлде» номинацияга бирги черни кымга-даа тывыспаан, ийиги черни Каа-Хем кожуун чагыргазының өөредилге эргелелиниң начальниги Саяна Ензак, үшкү черни база катап Өвүр кожуун чагыргазының күш-ажыл болгаш социал хөгжүлде эргелелиниң начальниги Урана Монгуш алганнар.
«Дагдыныкчы чорук» деп номинацияга тергиин тиилекчини үндүрбээн. Иийги черни Кызыл мэриязының административтиг-техниктиг хайгаарал эргелелиниң начальниги Елена Чооду алган болза, үшкү черде база катап Өвүрден специалист – кожуун чагырга даргазының социал политика болгаш хөй-ниити организациялары-биле кады ажылдажылга талазы-биле оралакчызы Чодураа Шойдан ээлээн.
Ол ышкаш ажылынга шылгараан 36 муниципалдыг специалистерге Тус чер бот-башкарылгазын хөгжүдер бүгү-российжи ассоциацияның аңгы-аңгы шаңналдарын тывыскан. «Тыва Республиканың муниципалдыг тургузуглар чөвүлели» ассоциацияның өөрүп четтириишкин бижиктерин болгаш хүндүлел бижиктерин 20 кижи алган.
Ирина Казанцева хемчегни доозуп тура, республиканың чурттакчыларының амыдыралын экижидер дээн төлевилелдер болгаш эгелээшкиннерниң чугулазын демдеглеп, хуралдың киржикчилеринге байырын чедирген. Тус чер чагыргаларының ажылдакчыларының төрээн чериниң ниити чаагай чоруу болгаш чечектелиишкини дээш оларның тура-чүткүлүн, профессионал чоруун ам-даа быжыглаар херек деп ол демдеглээн.