Регионнуң Баштыңы Владислав Ховалыгның даргалаашкыны-биле Тыва Республиканың Күрүне чөвүлелиниң бо чылда бирги хуралы болуп эрткен. Күрүне чөвүлелиниң кежигүннери боттарының одуруунче чаа үежилерин хүлээп, Ада-чурттуң Улуг дайынынга Тиилелгениң 80 чылдаанынга тураскааткан хемчеглерни белеткээриниң чорудуун чугаалашкан. Күрүне чөвүлелиниң кежигүннериниң кичээнгейин «Тыва Республиканың тулган кожууну» ат дээш мөөрейниң төлевилели хаара туткан.
Эрге-чагырганың хоойлужудулга болгаш күүсекчи, тус чер бот-башкарылга органнарының болгаш хөй-ниити черлериниң удуртукчулары кирген республиканың дээди чөвүлээр эргелиг органының 44 кежигүнүнүң киржилгези-биле Күрүне чөвүлелиниң хуралы болуп эрткен.
Владислав Ховалыг хуралдың хүн чурумун киржикчилерге таныштырып тура, аңгы-аңгы деңнелдиң күрүне эрге-чагыргазының шупту органнарының мурнунда сорулга – юбилейлиг хемчеглерже хөй кижилерни хаара тудуп, ону шынарлыг эрттирери демдеглээн. Бир дугаарында, Ада-чурттуң Улуг дайынының киржикчилеринге, эки турачыларга, тылдың ишчилеринге тураскааткан хемчеглерни бедик деңнелге эрттирер. Ада-чурт камгалакчызының чылында тускай шериг опреациязының киржикчилери – мөчээн дайынчыларга сактыышкын мөгейиглерни бээри база чугула.
- Аныяктарны болгаш шупту салгалдарының кижилерин хаара туткан байырлалдың солун программаларын тургузары - патриотчу кижидизилгениң база профилактиктиг ажылдың өзээ апаар ужурлуг. Амыдырал-хандырылга, корум-чурум камгалаар албаннарның, хөй-ниити күштериниң база эки турачыларның шуптузунуң белен чоруун хандырар херек – деп, Тываның Баштыңы демдеглээн.
Владислав Ховалыг чөвүлел кежигүннери – муниципалдыг тургузугларның удуртукчуларынга профессионал байырлалы – Тус чер бот-башкарылга хүнү эрте берген-даа болза, байырын чедирип, республиканың Күрүне чөвүлелиниң чаа кежигүннеринге хөрек демдектерин тыпсып, муниципалдыг албанның хоочуннарын күрүне шаңналдары-биле демдеглээн.
Чеди-Хөл кожууннуң баштыңы-Төлээлекчилер хуралының даргазы Мерген Сат, Чөөн-Хемчик кожуун чагыргазының даргазы Айдыс Куулар, Эрзин кожуун чагыргазының даргазы Салим Кызыл-оол Күрүне чөвүлелиниң чаа кежигүннери болганнар.
Ниитилел ужур-уткалыг хемчеглерни белеткеп эрттиреринге идепкейлиг киржилгези дээш «Ада-чурттуң мурнунга ачы-хавыяазы дээш» орденниң II чергезиниң медалы-биле Кызыл хоорайның Төлээлекчилер хуралының даргазының оралакчызы Аяс Леонидович Лопсанны шаңнаан.
Тус чер бот-башкарылга органнарынга хөй чылдарда ак сеткилдиг ажылы дээш, «ССРЭ-ниң составынче ТАР-ның эки тура-биле каттыжып киргениниң 80 чылы» юбилейлиг медаль-биле Валентина Игнатьевна Егорова, Киисин Александрович Мон оларны шаңнаан.
Тус чер бот-башкарылга органнарынга хөй чылдарда ак сеткилдиг ажылы дээш «Тыва Республиканың алдарлыг ажылдакчызы» хүндүлүг атты Улуг-Хем кожууннуң Арыг-Үзүү суму чагырга даргазының социал политика талазы-биле оралакчызы Марина Кызылайевна Монгушка тывыскан.
Күрүне чөвүлелиниң кежигүннери «Тыва Республиканың тулган кожууну» ат дээш республика мөөрейиниң төлевилелин сайгарып көргеш, документини ам-даа чедир ажылдаарын сүмелээн. Чазактың тускай угланыышкынныг адырларының санал-оналдарын көрүп, тус чер бот-башкарылга органнарының ажыл-чорудулгазын үнелээр көргүзүглерни ай дургузунда эде көөр даалганы берген.
Ада-чурттуң Улуг дайынынга Тиилелгениң 80 чылынга тураскааткан хемчеглер чорудуунуң дугайында республиканың организастыг комитединиң баштыңы, Тыва Республиканың Баштыңының Администрация болгаш Тыва Республиканың Чазак Аппарадының удуртукчузу Юрий Ананьин илеткээн. Республиканың культура сайыды Виктор Чигжит, Кызыл хоорайның мэри Карим Сагаан-оол, Каа-Хем биле Кызыл кожууннар чагыргаларының даргалары Станислав Киштеек биле Евгений Овсянников немей илеткээннер.
Улуг Тиилелгениң 80 чылдаанын белеткеп база эрттирер хемчеглерниң каттышкан планында 800 ажыг болуушкуннар кирген, оларның 86-зы республика чергелиг кылдыр, а 762 хемчег муниципалдыг тургузугларга эртерин дыңнаткан. Юбилейлиг чылдың дургузунда бүгү-ле хемчеглерни боттандырар. Апрельдиң 29-ка чедир 149 хемчег болуп эрткен. Амгы үеде майның 8 биле 9-та болур хемчеглерге белеткел чоруп турар. Тиилелге хүнүнүң бүдүүзүнде Кызылда Ада-чурттуң Улуг дайынынга тураскааткан тураскаалдар болгаш мемориалдыг комплекстер чанынга митингилер, В. Көк-оол аттыг ТР-ниң Национал театрынга Тиилелгениң 80 чылынга тураскааткан байырлыг хурал болур.
Регионнуң Чазак бажыңының баарында, Россия Федерациязы биле Тыва Республиканың күрүне туктарын көдүрер езулал-биле Тиилелге хүнүнүң байырлал хемчеглери эгелээр. Кызылда Арат шөлүнге Тиилелгениң чыскаалы 10.00 шакта, а «Өлүм чок полк» бүгү-российжи акцияның киржикчилериниң чыскаалы 11.00 шакта эгелээр. Ол хүн Арат шөлүнге байырлал концерттери, темалыг шөлчүгештер, акциялар база болур. Чогаадыкчы коллективтерниң база билдингир күүседикчилерниң киржилгези-биле аныяктар концертти 19.00 шакта болуп эртер. Ада-чурттуң Улуг дайынынга Тиилелгениң 80 чылынга алдар болдурган байырлалдың салюду 22.00 шакта Кызылдың кырынга диңмиттелир.
Күрүне чөвүлелиниң кежүгүннери муниципалдыг тургузугларның социал-экономиктиг хөгжүлдезиниң хүннүң чугула айтырыгларын база тус чер чагыргалар удуртукчуларның хууда контролю херек айтырыгларны хуралдың төнчү кезээнде сайгарып көрген.