Владислав Ховалыг Донецк Улус Республикага сургакчылап чорааш, Донецк хоорайда Чаңгыс аай дүүштүрүлге төвүнүң салбырынга четкен. Тываның Баштыңы төптүң ажылдакчылары болгаш чурттакчылары база Командирлер чөвүлелиниң кежигүннери-биле ужурашкан. Төпте амгы байдалды, деткимче негеттинип, дүрген шиитпирлээр айтырыгларны база сайгарган. Делегация-биле кады келген төлээлер – Тываның алдарлыг артистери Андрей Монгуш, Игорь Көшкендей база Ишкин оглу аалчыларга болгаш төптүң ажылдакчыларынга ыры-шоорун бараалгатканнар.
Төптүң ажылдакчылары Тывадан аалчыларны экскурсияладып, кандыг ачы-дузалар барын, ЧДТ-ниң ажылын экижидеринге чүнү шиитпирлеп болурун чугаалаан. Төптүң ажылы тодаргай чурумнуг. Салбырның төлээлери харылзааже үнмейн барган дайынчыларны дилеп-тыварынга төрелдеринге болгаш чоок улузунга дузалажырындан аңгыда, документилер-биле ажылдап, читкен дайынчыларның албан эрттирип турганы шериг кезектериниң командылал чери-биле харылзажып, организастыг айтырыгларны шиитпирлеп, төрелдеринге деткимчени көргүзүп, тус черниң эрге-чагыргазы болгаш волонтер организациялары-биле кады ажылдап турар.
- Төп дайынчыларывыска болгаш оларның чоок кижилеринге херек кырында чаглактаныр бажыңы апарганын бодум көрдүм. Ооң ажылын оон-даа экижидер дээш, бүгү күжениишкиннерни салыр бис – деп, Владислав Ховалыг төпке чораан соонда, бодунуң блогунда бижээн.
Төп Донбассче чоок кижилерин дилеп келир ужурга таваржып турар Тывадан кижилерниң доктаар чери апарганын, салбырның ажылдакчылары кээргеп чугаалаан.
- Дыка хөй кижилер бээр кээп турар. Ол дээрге, колдуунда-ла авалары, кадайлары дээш, херээжен чон-дур. Эмнелгеде балыгланган улузун ажаап-карактап келген төрелдери база маңаа кээр. Түр када халас чурттаарынга бүгү таарымчалыг байдалдарны тургускан бис. Маңаа келген кижи бүрүзүнге дузалажып тур бис – деп, төптүң ажылдакчызы Отчугаш Күжүгет чугаалаан.
Тываның Баштыңының эгелээшкини-биле Тывадан гуманитарлыг дузаны үлежиринге дузалажыр дээш тургустунган Командирлер чөвүлели читкен дайынчыларны дилээринге улуг дузаны көргүзүп турар. Бо хүнде Командирлер чөвүлелиниң составында аңгы-аңгы кезектерден 23 офицер кирген.
– Улусчу фронтунуң шугуму-биле чедип келген ачы-буян дузаламчызын маңаа чыып алгаш, моон дайынчыларже үлеп чорудуп турар. Ындыг төптү ажытканы - дыка эки эгелээшкин. Чүге дизе, тылдан деткимче чокта тиилелге болдунмас – деп, командирлер чөвүлелиниң даргазы Чаян Хомушку демдеглээн.
Командирлер чөвүлелиниң кежигүннериниң харылзаазы таварыштыр читкен дайынчылар дугайында херек медээлерни болгаш сан-чурагайларны элээн дүрген тып ап болурун төптүң ажылдакчылары Владислав Ховалыгга чугаалаан.
Тываның Баштыңы Владислав Ховалыгның эгелээшкини-биле, читкен шериг албанныгларның төрелдеринге чоок кижилерин тыварынга дузалажыр Чаңгыс аай дүүштүрүлге төвү эрткен чылдың майда тургустунганын сагындыраал. Республикага чаңгыс аай дүүштүрүлге төвү тургустунгандан бээр алды ай эрткенде, Владислав Ховалыгның даалгазы-биле Донецк хоорайга ооң салбырын ажыткан.
2024 чылдың август айда регионнуң Баштыңы Донбассче сургакчылап чорааш, шериг албанныгларга «ис чок читкен» деп эрге-байдалды алыр дээш дайынчыларның төрелдериниң барып турары Донда-Ростов хоорайда 522 дугаарлыг төп-биле бо төптүң аразында кады ажылдажылгазын боду углап-баштаан.
Владислав Ховалыг ынчан чорааш, Донецк Улус Республикада Кижиниң эргелериниң талазы-биле бүрүн эргелиг төлээ чериниң аппарады Чаңгыс аай дүүштүрүлге төвүнүң ажыл-чорудулгазынга дузалажырын Донецк Улус Республиканың Чазааның Даргазының албан-дужаалын ээлеп турган Евгений Солнцев-биле кады дугуржуп алган турган.