Россияда эң улуг - Тываның найысылалында сарыг шажыг хүрээзи апрель 28-те ийи чылдаанын демдеглээн. Республиканың Баштыңы Владислав Ховалыг чүдүкчүлерге болгаш хүрээ тудуунга киришкен бүгү кижилерге ол онзагай хүн-биле байырын чедирген.
«Хүрээниң тургустунуушкунунга болгаш хөгжүлдезинге киришкен кижи бүрүзүнге – тудугжуларга, лама-башкыларга, волонтерларга, бүгү чүдүкчүлерге, Күжүгет Шойгу аттыг культура фондузунга сеткилимниң ханызындан өөрүп четтиргенимни илередип тур мен. Силерниң күжениишкиннериңер ачызында «Тубтен Шедруб Линг» хүрээзи бистиң республикавыстың чоргааралы болгаш үнелеп четпес эртинези апарган» - деп, ол бодунуң блогунда бижээн.
Орус дылче очулдурарга «Будданың өөредиин билип алыр оран-сава» деп адаар «Тубтен Шедруб Линг» хүрээзи сөөлгү ийи чылда республиканың чурттакчыларынга сарыг шажынның чаңчылдарын болгаш билиглерин кадагалап, сайзырадырынга, сүлде-сүзүг чырыдыышкынынга болгаш мөзү-шынар кижизидилгезинге үнелеп четпес үлүг-хуузун киирген деп, Тываның Баштыңы демдеглээн.
Шынап-ла, хүрээ чүгле Тываның эвес, Россияның өске-даа регионнарының буддистерин сорунзалаан чер апарган. Даштыкыдан сарыг шажынның чүдүкчүлерин база хаара тудуп турар. Хүрээ ажыткан соонда чүгле баштайгы айларында 100 муң ажыг кижи сонуургап келген. А 2024 чылда республика туристер санын көвүдеткени-биле чурттуң лидери апарган, оларның эвээш эвес кезиин чүдүкчүлер тургускан.
Буддийжи философия-биле быжыг холбаалыг оюн - шыдыраа маргылдаазы-биле хүрээ бодунуң төрүттүнген хүнүн бо удаада демдеглээн. Россия, Белоруссия, Моолдан дээш, аңгы-аңгы чурттардан 50 ажыг шыдыраачы аңаа киришкен.
Кызыл хоорайга «Тубтен Шедруб Линг» хүрээзи 2023 чылда ажыттынганын сагындыраалы. Хүрээ тудар черни 1992 чылда 14-кү Далай-Лама башкы шилип, аңаа атты база тывыскан. Хүрээниң шөлү 8 муң ажыг дөрбелчин метр, ооң бедии 12 каът бажың хире - 56 метр. Иштинде сарыг шажын бурганнарының алды овур-хевирин саадаткан, оларның аразында Будда Шакьямуниниң 10 метр бедик дүрзүзү бар, ында буддизмниң үндезилекчизиниң хүлүн база шыгжаан.
«Тубтен Шедруб Линг» хүрээзиниң делегейде эң-не билдингир аалчыларының аразында Россияның Президентизи Владимир Путин база бар. 2024 чылдың сентябрьда Тывага ажыл-албан аайы-биле кээп чорааш, хүрээни сонуургаан.