Ада-чурттуң Улуг дайынының хоочуннарынга хүндүткел болгаш өөрүп четтириишкин

25.04.2025 05:53

Ада-чурттуң Улуг дайынынга Тиилелгениң 80 чыл оюнуң мурнунда Тываның Баштыңы Владислав Ховалыгның эгелээшкини-биле ук дайынның хоочуннарынга онза өөрүп четтириишкинниң болгаш оларның ачы-хавыяазын ниитилелдиң үнелээниниң демдээ кылдыр чаңгыс катап 50 муң рубльдиң төлевирин бээр.

Улуг байырлалдың бүдүүзүнде Владислав Ховалыг Тыва Республиканың Дээди Хуралынга (парламентизинге) республикада ажыл-агыйының болгаш 2025 чылда иштики политика дугайында айтыышкынынга саң-хөө деткимчезин эгелээрин дыңнатканын сагындыраал.

«Ада-чурттуң Улуг дайынының дириг киржикчилерин деткип, мөчээн дайын хоочуннарының дугайында сактыышкынны кадагалап арттырары - бистиң хүлээлгевис – деп, Тываның Баштыңы ол үеде чугаалаан. - Юбилейлиг чылда Ада-чурттуң Улуг дайынының киржикчилеринге болгаш инвалид хоочуннарынга, ол ышкаш оларга дең эргелиг кижилерге чаңгыс катап 50 муң рубль төлевирни бээр дугайында шиитпирни хүлээп алдым».

Тываның Баштыңы Владислав Ховалыгның даалгазы-биле регионнуң Күш-ажыл болгаш социал хөгжүлде яамызы тус черниң эрге-чагырга органнары-биле кады республиканың девискээринде чурттап чоруур Ада-чурттуң Улуг дайынының хоочуннары болгаш инвалидтери, ол ышкаш республиканың девискээринде олар-биле дең эргелиг төлевир алыкчыларының даңзызын шудургузу-биле тургускан. Оларның аразында бирээзи назы четпээн үезинде фашист концлагерьге хоругдаттырып чораан, тылдың 30 ажыг ажыл-ишчизи, амы-тынындан чарылган солдаттарның кадайлары болгаш инвалидтер саны 15 кижи. 2025 чылдың апрель 30-ге чедир 51 кижи төлевирни алыр.

Ук төлевирлер Тыва Республиканың бюджединден көрдүнген. Күш-ажыл яамызының организастаан ажылы төлевирни алыр ужурлуг улус үе-шаанда алзын дээш, даңзыны үре-түңнелдиг тургузар аргалыг болган.

Тываның Баштыңы Владислав Ховалыгның онзалап демдеглээни-биле алырга, юбилейлиг чылда хоочуннарны деткиир шак мындыг хемчеглер турары чугула.

Бо эгелээшкин делегей төөгүзүнде Улуг Тиилелгени чедип алырынга эрес-дидими болгаш тура-соруктуу-биле дузалашкан кижилерге бүгү регионнуң мурнундан хүндүткел болгаш өөрүп четтириишкин болур.

Теги: 80-летие Великой Победы, единовременные выплаты ветеранам Великой Отечествернной войны, ветераны Великой Отечествченной войны