Тываның Баштыңы Владислав Ховалыг Луганск Улус Республиканың баштыңы Леонид Пасечник-биле апрель 22-де ужурашкан. Тус черниң чонунга ачы-дуза чедирилгезиниң дугайында чугаалашканының дугайында регионнуң баштыңы бодунуң хууда блогунда демдеглээн.
«2023 чылдан эгелеп Свердловск муниципалдыг округка дузалап, тус черниң инфраструктуразын катап тургузар талазы-биле ажылдарны кылып чорудуп турар бис. Өөредилге албан черлери бирги черде. «Бо чоокку үеде ол черже барып, чаа объектиде ажылдың чоруп турарын үнелээр планныг мен» – деп, Владислав Ховалыг чугаалаан.
Тываның Свердловск хоорайга ачы-дузазы дээш, Леонид Иванович өөрүп четтиргенин илереткеш, Красный Лиман, Лисичанск база Кременная хоорайларны хостаарынга Тывадан келген эрес-дидим дайынчыларның үлүг-хуузу улуг дээрзин онзалап демдеглээн.
«Тускай шериг операциязының чугула базымнары ЛУР-нуң болгаш бүгү Россиявыстың бүдүн-бүрүн чоруун кадагалап арттырарының чугула чадалары болган – деп, Тываның Баштыңы онзалап демдеглээн.
Тус черни хостаар талазы-биле тулчуушкунга эң-не төлептиг киришкен Тываның дайынчыларын Луганск Улус Республиканың күрүне шаңналдары-биле демдеглээр дугайында дилегни Владислав Ховалыг ЛУР-нуң удуртукчузунга киирген.
«Леонид Иванович дилээмни өөрүшкү-биле күүседир дугайында аазады. Шаңнал алыр маадырларның аттарын шериг кезээниң командылалының киирген дужаалдарынга даянып тодарадыр» - деп, Владислав Ховалыг түңнээн.