“Кирилл Песков Тыва Республикада чаңгыс чер чурттугларынга байырны дамчыдып тур! “ - деп, Тываның Баштыңы Владислав Ховалыг социал четкиде бодунуң арынынга бижээн.
— Бо чылын бис тоолчургу хүн – Космонавтика хүнүнге онза сеткил-хөөннүг уткуп тур бис. Ам чурттар аразының космос станциязында Роскосмостуң шинчилекчи космонавтызы Кирилл Песков бар. Ол бодунуң ук-дөзүн сактып чоруур болгаш, космосче төрээн республиказының тугун ап алганы өөрүнчүг.
Космиктиг миссияны дооскан соонда Кириллдиң Тывага чедип кээрин четтикпейн манаар бис. Школачыларга болгаш аныяктарга космонавт космосче ужудуушкунга канчаар белеткенип турганын болгаш бодунуң күзелинче узун оруунуң дугайында күзелдии-биле чугаалап бээр дээрзинге бүзүрээр мен.
“Боттарыңарның күзелдериңерге бүзүреңер, оларны чуртталгага боттандырып шыдаар силер! Кижи шыдавас чүве чок! – деп, космонавт бистиң аныяктарывыска чугаалап турар”.