Тывада башкылар мөөрейи кидин түлүк

11.04.2025 15:23

Тывада Бүгү-российжи башкылаашкын мергежилиниң мөөрейиниң регионалдыг кезээ кидин түлүк. Улуг адааннажылга апрель 7-де эгелээн, а апрель 12-де аңгы-аңгы адырларның тиилекчилериниң аттары билдинер. Бо удаа 246 башкы профессионал мөөрейге киржир күзелин илереткеннер. Ол дээрге школаларда башкылар, бичии уруглар садтарының кижизидикчилери, өөредилге организацияларының удуртукчулары, психологтар, дефектологтар болгаш шупту кожууннардан немелде өөредилге черлериниң башкылары. Олар рес­публика чадазынга киржир дээш, эге дерээзинде муниципалдыг деңнелге шыңгыы шилилгени эрткеннер.

Бо чылын 35 дугаар юбилейлиг адааннажылга эрттип турары бо. Мөөрей 8 аңгы шөлчүгеште болуп турар: “Профлидер” деп Кызылдың 19 дугаар школазында, ол ышкаш 17 дугаар школада, найысылалдың 1, 27 дугаарларлыг уруглар садтарында, Тываның тудуг техникумунда, Республиканың күрүне лицейинде, “Сайзырал” төвүнде болгаш Тываның кадет корпузунда. Ниитизи-биле 12 мөөрей болуп турар.
Төөгүлүг чаңчыл апарган “Чылдың башкызы” мөөрейинден аңгыда, программада “Чылдың кижизидикчизи”, “Чылдың мастери”, “Психолог башкы”, “Өөредилге организациязының тергиин удуртукчузу” , “Тергиин дефектолог башкы”, “Тыва дыл болгаш чогаалдың тергиин башкызы” деп номинациялар бар. Ук мөөрейлерниң тиилекчилери бо күзүн российжи чадаже аъттаныптарлар.

Апрель 9-та “Уругларга чүрээм сөңнедим” деп мөөрейге немелде өөредилге черлериниң 15 башкызы түңнел мөөрейже үнер дээш күжүн шенежип турганнар. Киржикчилер “Чедиишкинче сээң орууң” деп кичээлди эрттиргеннер. Оон аңгыда, кандыг-даа белеткел чокка бөлүк мурнунга түр када чогаадып күүседир шенелде кичээлдерни база эрттирген. Ийи кезектиг сөөлгү чада болган. Киржикчилер “Аңгы-аңгы билиглерге башкылар маргылдаазынга” болгаш бот-тус­кайлаңын бараалгаткан мөөрейге киришкеннер. Ооң тиилекчизиниң ады өскелер-биле деңге апрель 12-де байырлыг байдалга билдинер.

Теги: Учитель года, конкурс педагогического мастерства, педагоги Тувы, Минобразования Тувы