Регионнуң девискээринге террорга удур айыыл чок чоруктуң айын чарлаарының дугайында шиитпирни Владислав Ховалыгның башкарып эрттиргени террорга удур комиссия биле Тыва Республикада оперативтиг штабтың каттышкан хуралынга хүлээп алган. Террорга удур айыыл чок чоруктуң айының үезинде хемчеглер республиканың чурттакчыларының терроризм дугайында билиглериниң деңнелин бедидеринге болгаш ону болдурбазының болгаш оон камгаланырының аргаларын билип алырынга дузалаар.
Удатпас болур чугула байырлал хүннеринде хөй-ниитиниң айыыл чок чоруун хандырар, террорисчи болгаш экстремисчи угланыышкынныг айыылдарны болдурбазы-биле бүгү болур-чогуур хемчеглерни алыр херек деп республиканың террорга удур комиссиязының база оперативтиг штабтың кежигүннеринге регионнуң удуртукчузу чугаалаан.
— Тускай шериг операциязының үезинде чуртта ниити байдалды баксырадыр дээн соксаал чок оралдажыышкыннар-биле холбаштыр кижи бүрүзү серемчилелдиг болгаш харыысалгалыг болуру чугула – деп, Тываның Баштыңы демдеглээн.
Россияның Айыыл чок чоруктуң федералдыг албанының, РФ-тиң ИХЯ-зының, Росгвардияның, Россияның ОБЯ-зының ТР-де кол эргелелдериниң удуртукчулары хөй-ниитиниң болгаш өртке удур айыыл чок чоруктуң, террорисчи айыылдарга болгаш диверсияга удур камгалалды хандырарының талазы-биле ап чорудуп турар хемчеглер дугайында террорга удур комиссия биле Тыва Республикада оперативтиг штабтың каттышкан хуралынга илеткээннер.
Байырлалдар хемчеглерин эрттирип турар үеде үстүнде айыттынган ведомстволарның ажылдакчыларының ажыл-албанын күштелдирген чурумче шилчидер, ол албан черлериниң оперативтиг ажылдакчыларының санын байырлал хүннеринде көвүдедир.