“Россияда ажыл. Ажылдаарның үези” ярмарканың апрель 18-те болуп эртер бо чылгы регион чадазынга Тываның улуг инвесторлары киржир дугайында Тываның Экономиктиг хөгжүлде яамызы дыңнадып турар. Эльбрусметалл-литий» КХН, «Лунсин» КХН, «Тувинская ГРК» КХН, «Тардан Голд» КХН, «БТК групп» АН ышкаш улуг инвесторлар болгаш бүдүрүлгелер оларга ажылчын күш херегин чарлаан. Бо чылын ук ярмарканы “Кадрлар” национал төлевилелдиң угланыышкыны-биле организастап эрттирип турар. Ажыл берикчилериниң, өөредилге черлериниң, компанияларның болгаш күрүнениң кады ажылдажылгазы дамчыштыр бүдүрүлгелерге херек ажылчын кадрларны белеткээринче бо төлевилелди угландырган. Ярмарканың эртер чери Кызылда Аныяктар ордузу.
Ярмарканың кол организакчызы республиканың Күш-ажыл болгаш социал политика яамызы ажыл берикчилериниң талазындан киржикчилерин тодарадып турар. Амгы үеде кол сорулга – ажылчыннар дилеп турар организацияларны болгаш бүдүрүлгелерни болдунар шаа-биле ярмаркага хаара тудары. Ярмаркага киржир чагыгларны амгы үеге чедир 23 ажыл берикчизи киирген.
Тываның Тудуг яамызының медээзи-биле алырга, ярмаркага киржирин тудуг компаниялары, “Суугу” КХН, “Оникс” КХН, “Өлчей” КХН, “Строй-Экспресс” КХН бадыткаан. Тудуг болгаш өске-даа организацияларның киирген чагыглары ёзугаар алырга, электрогазосварщик, электромонтажник, электрик мергежилдиглер, геодезист, ПТО инженери, сметчик болгаш кадастр инженери эртем-билиглиг ажылдакчылар чедишпейн турар.
Ажыл дилеп турар кижилерге Тыва Республиканың Саң-хөө яамызы, Кадык камгалал яамызы, Кызыл хоорайның мэриязының өөредилге талазы-биле департаментизи, Тыва Республиканың Алдан-Маадыр аттыг национал музейи, «Тываавтотранс» транспорт компаниязы, "Россети Сибирь Тываэнерго" АН, Россияның федералдыг айыыл чок албанының Тыва Республикада Кызыгаар эргелели, Республиканың Перинаталдыг төвү болгаш өске-даа хөй организациялар база ажылды сүмелээр.
Тываның Күш-ажыл болгаш социал политика яамызы республикада ажыл берикчилерин ажылга хаара тудар ярмаркага кандыг ажылчын күш херегин киирип чарлаарын чалап турар. Кандыг мергежилдиг болгаш эртем-билиглиг кижилер ажылга херек дугайында медээлерни ovr@trudtuva.ru электроннуг почтаже чорудуп, 2-10-10, 3-69-96 дугаарлыг телефоннар дамчыштыр тайылбырны ап болур.
2023-2024 чылдарда ажылга хаара тудар ярмаркага Тывадан 27 муң ажыг кижи киришкен. Оларның иштинден 7 муң хире кижи ажыл дилеп келген. Түңнелинде 2504 кижи ажылга тургустунган.