Марттың 21-де, Владислав Ховалыг республиканың ниити юрисдикция судтарының 2024 чылда ажылының түңнелдерин сайгарып, 2025 чылдарның сорулгаларын тодараткан Тыва Республиканың Дээди судунуң президиумунуң база Тыва Республиканың Суд департамент эргелелиниң коллегиязының улуг хуралынга киришкен.
Регионнуң баштыңы республиканың суд ниитилежилгезинге байырны чедирип, республикада суд органнарының ажылының чугулазын, ниитилелдиң социал турум чоруун хандырарынга, хоойлу-дүрүм болгаш корум-чурумну тургузарынга суд корпузунуң үлүүн онзалап демдеглээн.
– Эрге-чагырганың шупту адырлары: күүсекчи, хоойлужудулга, суд эрге-чагыргазы хамаатыларның эргелерин болгаш хоойлу езугаар сонуургалдарын камгалаар чаңгыс сорулгалыг. Бистиң чуртувус улуг шенелделерни эртип, амыдыралдың бүгү-ле адырларында улуг хемчээлдиг өскерлиишкиннер болуп турар. Шынап-ла, эрге-хоойлу системазы база дүрген өскерлип турар - деп, Владислав Ховалыг демдеглээн.
Республика Баштыңы кем-херек үүлгедиишкиннерин болдурбазынга суд системазының чугула ролюн онзалап айыткан. Хамаатыларны, ылаңгыя аныяктарны эрге-хоойлу талазы-биле кижизидер ажылды чорудуп, ону ам-даа уламчылаары чугула дээрзин ол демдеглээн.
– Ведомстволар аразының комплекстиг ажылының түңнелинде, Тывада кем-херек үүлгедиишкиннериниң чавырлырын чедип алган бис. Суд системазының ажылдакчыларының бедик мергежили, арга-дуржулгазы база ат-алдары бурунгаар чүткүүрүнге чылдагаан бооп турар - деп, Баштың демдеглээн.
Владислав Ховалыг ТШО-нуң киржикчилерин болгаш оларның өг-бүлелерин деткиир ажылга идепкейлиг киржип турары дээш суд ниитилелинге өөрүп четтиргенин илереткен. Оларның чугаазы-биле алырга, хүндүлүг дыштанылгаже үнген судьялар база амгы үеде ажылап турар судьялар бо ажылче онза кичээнгейни углап, Луганск Улусчу Республикада шефке алганы чурттакчылыг черлеринге болгаш дайынчыларынга гуманитарлыг дуза чыылдазында идепкейлиг киржип турар.
Тыва Республиканың Дээди Судунуң даргазының хүлээлгезин күүседип турар Эдуард Орешков Тыва Республиканың ниити юридикция судтарының 2024 чылда ажылының түңнелдериниң дугайында илеткелди таныштырган.
Тыва Республикада Суд департаментизиниң начальниги Денис Успенский Тыва Республикада Суд департамент эргелелиниң 2024 чылда ажылының түңнелдериниң дугайында илеткелди кылган.
Тыва Республиканың Дээди Хуралының (парламентизиниң) Даргазы Каң-оол Даваа, Тыва Республиканың прокурорунуң оралакчызы Ольга Монгуш база Тыва Республика талазы-биле федералдыг инспектор Шолбан Монгуш олар республиканың суд ниитилелинге илеткелдерни номчаан.