Сарыг-Сеп суурга Тываның Баштыңы Владислав Ховалыг-биле Авдеевканы эжелеп алырынга киришкен тускай шериг операциязының киржикчилериниң ужуражылгазы болуп эрткен. Россияның Маадыры Буян Куулар база ТШО киржикчизи Болат Ондар чалаттырганнарның аразында. Ужуражылганың киржикчилери боттарының албанының аайы-биле тускай болуушкуннарны сайгарып, төрээн республиказының хөгжүлде планнарын үлешкеннер.
Шериг албанныгларның өг-бүлелеринче онза кичээнгейни угландырган. Болат Ондар биле Байлак Норбу өөнүң иштилери база ажы-төлү-биле ужуражылгага келгеннер. Тываның Баштыңы өг-бүлелерден социал деткимчениң чаа хемчеглерин ап турарын, ооң иштинде уруглар садтарынга төлевирден хостаар чиигелдерни ажыглап турарын айтырып, оларның-биле келир үеде амыдырал планнарын үлешкен.
"Байлак Борисович “Агростартап” төлевилелди сонуургап, көдээ ажыл-агыйга бодунуң күжүн шенеп көөр бодалдыг. Болат Ландарович бистиң "Тываның Маадырлары" деп кадрлар төлевилелин айтырып, өөренир шиитпирни хүлээп алды. Бо хүннүң байдалы-биле алырга, 180 киржикчи ында бүрүткеткен. Оларның көвөй кезии амгы үеде шериг албанында. Олар Тываның хөгжүлдези дээш сеткилден сагыш човап, аңаа идепкейлиг киржиксеп турарлар" - деп, Тываның Баштыңы бодунуң блогунда бижээн.
Тускай операцияның база бир киржикчизи Сергей Казанцев элээди-даа болза, ачазының үлегерин эдерип, Төрээн чуртунга бараан болурун күзеп чоруур оглу Кириллди ужуражылгаже чоруткан. Сергей Казанцев албан-хүлээлгеже аъттаныпканын, ужуражылгага кээп шыдавазын көргеш, хемчегже ооң өг-бүлезин чалаан.
Ужуражылганың киржикчилери Тыва чазактың деткип турары аңгы-аңгы социал төлевилелдерже сонуургалын илереткеннер. Олар «Тываның маадырлары» деп регионалдыг эгелээшкинниң аргаларын ылавылап айтырганнар. Тываның Баштыңы Владислав Ховалыгның эгелээни бо программа Россияның Президентизи Владимир Путинниң даалгазы езугаар күрүне эргелеп-башкарылга дээди школазының боттандырып турары «Маадырларның үези» федералдыг төлевилелдиң тус черде хевири болур. Регионалдыг программаның онзагай чүүлү – ортумак тускай эртемниг кижилерге ооң чедингири. Программаның сорулгазы – дайынчы хөделиишкиннер хоочуннарын болгаш киржикчилерин деткиири, амыдыралдың чаа сорулгаларын тодарадып, профессионал арга-шинээн сайзырадыры.
«Тываның маадырлары» программаның киржикчилери күрүне албан черлеринге, күүсекчи эрге-чагырга, тус чер бот-башкарылга органнарынга болгаш өске-даа федералдыг болгаш республика структураларынга ажылды алыр аргалыг апаар. Ол чүүл хоочуннарның ниитилелге чедиишкинниг чаңчыгарынга болгаш мергежилдиг кижилер кылдыр арга-шинээн боттандырарынга дузалаар. Марттың 6-да «Тываның маадырлары» кадрлар төлевилелиниң бирги чадазы эгелээнин, ооң иштинде киржикчилерни бүрүткеп турарын сагындыраал. Бүрүткеткеннер аразында чүс ажыг кижи ТШО-нуң идепкейлиг кежигүннери болуп турар. Программага киржир бүрүткел апрель 9-ка чедир уламчылаар.
Дараазында чада – апрель 10-дан июнь 30-ге чедир айтырыгларга харыылар болгаш чугаажылга кылдыр эртер. Чугаалажылга үезинде кордакчыларның арга-дуржулгазын, профессионал мергежилин болгаш күрүне албан черлеринге ажылдаарынга беленин хынаар. «Тываның маадырлары» төлевилел ТШО киржикчилеринге болгаш хоочуннарынга күрүне ажыл-чорудулгазының аңгы-аңгы адырларында боттарының арга-шинээн боттандырар боттуг арганы бээр.