Кыдат Улус Республиканың Иркутск хоорайда чиңгине консул чериниң ажылдакчыларының делегациязы «Тыва: Агроинвест-2025» форумга киржири-биле Кызыл хоорайда келген. Кыдат бөлүктүң ажыл программазы езугаар республиканың Баштыңы Владислав Ховалыг биле чиңгине консул Ли Хай Тываның чазаанга ужурашкан.
Тываның Баштыңы Россия Федерациязы биле Кыдат Улус Республиканың аразында дипломатчы харылзааларның тургустунганындан бээр 75 чыл ою-биле ужуражылганың киржикчилеринге байыр чедиргеш, бот-боттарынга ажыктыг кады ажылдажылганың аргаларын чугаалажып көөрүн саналдаан.
Бистиң чурттуң Президентизи Владимир Владимирович Путин энергетика, үлетпүр, көдээ ажыл-агый, бедик технология, инновация, инфраструктура, тудуг болгаш транспорт талазы-биле кады ажылдажылганы ийи чурттуң кады ажылдажылгазының кол угланыышкыннарының санынче кииргенин ол демдеглээн.
Ийи тала регион деңнелинге кады ажылдажылга талазы-биле мурнады боттандырар угланыышкыннарны тодараткан.
- Тываның географтыг туружу болгаш кызыгаар чоогунда чыдары транспорт инфаструктуразының адырында төлевилелдерге ужур-дузалыг. Тываны таварты Россиядан Барыын Кыдатче чер кырының болгаш авиация транспортунуң эң кыска оруун тургузар аргаларны элээн чугаалаштывыс. Федералдыг чазактың деткимчези-биле ол угланыышкынга кызыгаарлар аразының оруун тургузарынга ажылдап турар бис. Ийи чурт агроүлетпүр комплекс адырынга база кады ажылдажылганы хөгжүдер аргаларлыг. Ли Хайның чугаазы-биле алырга, «Тыва: Агроинвест-2025» форум аңаа бадыткал болган – деп, Владислав Ховалыг ужуражылга соонда бодунуң блогунда бижээн.
Ийи тала удур-дедир культурлуг солчулга, шажын угланыышкынынга база туризм адырынга кады ажылдаарының аргаларын чугаалашкан.
Владислав Ховалыг 2026 чылда Тывага эртер III делегей чергелиг Буддийжи форумче Чиңгине консулду чалаан. Дээрги Ли Хай бодунуң ээлчээнде, Тываның Баштыңын бодунга таарымчалыг үеде Кыдат Улус Республикаже аалдап кээрин чалаан.
Кыдат делегацияның Тывага ажылдаар программазында Тожу кожуунда «Лунсин» даг-болбаазырадылга комбинадынче аалдап чедери база кирген. Тыва Республикада улуг инвесторларның бирээзи «Лунсин» КХН бүдүрүлгениң кол капиталының ээзи - «Хейлунцзянская горная компания Цзыцзинь Лунсин» деп кыдат компания болур. Инвестор республиканың социал-экономиктиг хөгжүлдезинге идепкейлиг киржип турар.