«Бистиң үлүг-хуувус» Национал шаңналдың финалынче кирген 106 социал эгелээшкиннер Тыва Республикада боттанып турар. РФ-тиң Чазааның Даргазының оралакчызы Александр Новак национал шаңналдың Эксперт чөвүлелин удуртуп турар. Бо дээрге, Россияда национал сорулгаларны чедип алырынга болгаш национал төлевилел сорулгаларын боттандырарынга бизнестиң болгаш коммерцияга хамаарышпас организацияларның киирген үлүг-хуузун үнелээр бирги шаңнал болур. Финалдың шупту киржикчилери «Россияның национал төлевилелдериниң партнёру» деп эрге-байдалды алыр.
Россия Федерациязының Чазааның Координация төвүнге РФ-тиң Чазааның Даргазының оралакчызы Александр Новактың, күүсекчи эрге-чагырганың федералдыг органнарының, ажыл-агыйжы каттыжыышкыннарының база хөй-ниити организацияларының төлээлери киржилгези-биле, «Бистиң үлүг-хуувус» Национал шаңналдың тиилекчилерин шаңнап-мактаар байырлыг езулал болуп эрткен. Ооң түңнелдерин нашвклад.рф премияның сайтызында база «Коммерсант» ном үндүрүлге бажыңының курлавырларында парлаан.
Шаңналдың тиилекчизи – ВТБ банк уругларның кадык камгалалының шынарын бедидеринче угланган «Карак чажы чок делегей» деп төлевилелди Тывада боттандырып турар. Программа боттандырылгазы-биле, муң-муң уругларга дыңнаар болгаш көөр талазы-биле аарыгларны дарый тодарадып, эмнээринге дузалаар кылдыр республиканың уруглар эмнелгезинде амгы үениң офтальмология болгаш сурдология дериг-херекселдерин салган. Чылдың-на эмнелге 5300 аарыг кижилерни стационарже хүлээп, амбулаторлуг эмнээшкинче 120 муң чедир чаштарны болгаш элээдилерни ап турар.
База бир чугула эгелээшкин – “Кадыкшыл булуңнары” деп төлевилелди “Россияның почтазы” эгелээн. Тээли, Чаа-Хөл, Барлык, Шекпээр, Эрзин, Балгазын, Хандагайты база Мугур-Аксыда он-он көдээ почта салбырларында тонометрлер, пульсоксиметрлер болгаш термометрлерни салган, чурттакчылар хан базыышкынын, ханында кислородтуң деңнелин болгаш температуразын боттары хайгаарап болур апарган. Ылаңгыя эвээш чурттакчылыг суурларда эмчи ачы-дузазы кызыгаралыг черлерге ол чугула херек.
Регионда мобильдиг харылзаа болгаш интернет чок чурттакчылыг пунктуларның саны эвээжеп турар, ол чүүл күрүне болгаш коммерцияның чурагайлыг ачы-дузаларның чедингирин бедиткен. Россияның Чурагай яамызының болгаш Россияның Чырыдыышкын яамызының деткимчези-биле «Чурагайлыг экономика» коммерцияга хамаарышпас автономнуг организацияның организастааны бүгү-российжи өөредилге төлевилели – «Чурагай кичээли» чурагай өөредилгезинге онза рольду ойнап турар. Кызылда болгаш өске-даа чурттакчылыг черлерде кичээлдер эрттирип эгелээн. Өөреникчилер капсырылгалар садыглары канчаар ажылдап турарын, мессенджерлерде кандыг алгоритмнер ажылдап турарын база чүге кылымал угаан медицинаны, тудугну болгаш өске-даа адырларны өскертип болурун билип алыр.
Школачылар чүгле чогуур билиглерни алыр эвес, а практиктиг быжыглаашкынны алыр кылдыр төлевилелди чурттуң мурнакчы IT компаниялары-биле кады боттандырып турар – бир чыл дургузунда бүгү чуртта 20 миллион ажыг кижи интерактивтиг «Чурагай кичээлинге» белеткенген. Ындыг эгелээшкиннер аныяктарга профессионал орукту медерелдиг шилип алырынга болгаш чурагайлыг экономиканың бергелеринге белен салгалды хевирлээринге дузалаар.
Чурттуң 89 регионундан 759 чагыг Национал премияга киржир кылдыр кирген. 252 организацияның 550 төлевилели түңнел кезээнче үнген. «Өөредилге», «Демография», «Экология» национал төлевилелдерниң социал эгелээшкиннерин боттандырары эң нептереңгей болуп артпышаан.
Шаңналдарның бо сезонда үре-түңнелдери эртем, кадык камгалал, культура, туризм болгаш хоорай хүрээлеңиниң чаагайжыдылгазы дээн ышкаш адырларда социал ажыл-чорудалгада сайгарлыкчыларның болгаш коммерциялыг эвес секторнуң сонуургалы өскенин көргүскен.
«Бистиң үлүг-хуувус» национал шаңналдың оператору – «Национал приоритеттер» коммерцияга хамаарышпас автономнуг организация.