2025 чылдың март 17-де, Кызыл хоорайга регионнуң эмнелге албан черлеринге чаа машиналарның дүлгүүрлерин дамчыдарынга тураскааткан байырлыг хемчег болуп эрткен. Бо болуушкун «Идепкейжи узун назын» национал төлевилелдиң күүселдези-биле кадык камгалалының бирги эмчи звенозун чаартыр программа боттандырылгазының бир кезээ болган.
Ниитизи-биле 90 хире млн. рубльге 47 санныг автотехниканы садып алган. Оларның санында 26 “УАЗ”, 18 “Лада Гранта”, 2 “Нива” маркалыг автомашиналар база бир көжүп чоруур маммография комплекизи бар. 2025 чылда эде чаартылга программазының регионалдыг чадазы-биле техниканы саткан. Тываның Баштыңы Владислав Ховалыг эмнелге албан черлериниң удуртукчуларынга дүлгүүрлерни байырлыг байдалга тывыскан.
«Идепкейжи узун назын» национал төлевилел шугуму-биле кадык камгалалының бирги звенозунуң эде чаартылгазы ам-даа уламчылаар болгаш чаа эмнелге автотранспортун алыры – эки арга – деп, Тываның Баштыңы дүлгүүрлерни тыпсыр тура демдеглээн. — Бедик технологиялыг дуза чедирилгези чылдан чылче экижип, республиканың ыраккы суурларының чурттакчыларынга чедингир апарып, бирги ээлчегде, эмчи транспортун чаартканы-биле ачы-дуза чедирилгези экижээн».
Регионнуң эмнелге албан черлериниң кол эмчилеринге дүлгүүрлерни тывыскан. Тускай дериттинген транспорт эмчи ачы-дузазының шынарын болгаш чедингирин бедидеринге, ооң иштинде аарыг кижилерни чедиреринге, эмчилер ол-ла черге шинчииринге, биоматериалдарны сөөртүрүнге болгаш ырак черлерниң чурттакчыларын эмнер-биле хандырарынга көрдүнген. Бо удаа автопарк 47 машинаны немей, сөөлгү чылдарда эң хөй партияны хары угда алганын демдеглезе чогуур, Тыва 2021 чылдан эгелеп 39 автомобильди алган.
Машиналарның көвей кезии көдээ черлерде фельдшер-акушер пунктуларының, эмнелге амбулаторияларының болгаш кожуун эмнелгелериниң ажылынга ажыглаар. Арткан машиналар хоорай болгаш кожуун эмнелгелериниң автопарыгынга каттыжар.
Бо немелде республиканың кадык камгалал системазын, ылаңгыя чедери берге кожууннарда эмчи дузазының деңнелин экижидип база сайзырадырынга чугула базым болган.