Тывада хөй талалыг ажыл-чорудулгалыг төптер күрүне болгаш муниципалдыг ачы-дуза алыкчыларының сонуургалдарынга дүүштүр ажылын сайзыраңгайжыдарын уламчылап турар. Республиканың Чазааның шиитпири-биле ТР-ниң Чурагайлыг хөгжүлде яамызынга МФЦ-ниң ажыл-чорудулгазынче чаа арга-хевирни – чаңгыс билдириишкин езугаар ачы-дузаның элээн каш хевирлерин көргүзерин дааскан. Ындыг ачы-дузаны ажылдатканы регионнуң чурттакчыларын ачы-дуза бүрүзүнге аңгы-аңгы билдириишкин кииреринден хостаар.
Чаа чүүлдүң кол утказы – бот-боттарынга хамаарылгалыг ачы-дузаларны каттыштырары. Чижээ, амыдыралдың кандыг-бир байдалы тургустунуп кээрге көргүзер ачы-дузаларны чаңгыс аайлап чыыптарын көрген. Тываның Чурагайлыг хөгжүлде яамызы, тодаргайлаарга, МФЦ-ниң чаш уруг төрүттүнгенинге хамаарышкан шупту ачы-дузаларны каттыштырган. Бо байдал бөгүнде 9 аңгы ачы-дузадан тургустунган – ие капиталын алырындан эгелээш, уругну уруглар садынга тургузарынга чедир.
Чаш төлдүң төрүттүнгенинден аңгыда, сайгарлыкчыларга болгаш боттарын ажыл-биле хандыртынган кижилерге деткимче хемчеглерин бүрүткедир МФЦ-ниң ажыл-чорудулгазы бөлүглээн ачы-дуза хевиринче шилчиир. Амгы үеде ону алырда микрочээлилер, субсидиялар, грантылар, консультация деткимчези дээш, оон-даа өске 9 аңгы билдириишкинни киирер ужурлуг. Оларны чаңгыс аайлап каттыштырыптарга, билдириишкин ээзи кижиниң чаңгыс дилээ чедер апаар.
Амыдыралдың ийи байдалынга хамаарыштыр амдыызында комплекстиг ачы-дуза чедирилгезин көргүзер. Ындыг болзажок, келир үеде ол талазы-биле өске-даа ачы-дузаларны эде көөрү планнаттынган, чүге дизе республиканың чурттакчыларындан чаңгыс билдириишкинни хүлээп ап ажылдаары МФЦ-ниң ажылын база чиигедип, элээн таарымчалыг апаар.
Күрүне ачы-дуза порталын хөгжүдери 2025 чылда Россияның Президентизиниң айытканы «Күрүнениң медээлер экономиказы база чурагайже шилчилге» национал төлевилелдиң бир кезээ болуп турарын сагындыраалыңар. Эрге-чагырга деңнелдериниң ажылын кижи бүрүзүнүң сонуургалдарынга дүүштүр тургузары, хамаатыларга болгаш бизнеске ачы-дузаларны идепкейлиг, үре-түңнелдерлиг дүрген көргүзер сорулганы В. Путин айыткан.