Ооржак Тыва Республиканың Чазааның Даргазының оралакчызы Орлан Сарыгларның удуртуп эрттиргени уругларның дыштанылгазын болгаш кадыкшылын быжыглаарын организастаар талазы-биле ведомстволар аразының комиссиязының хуралынга, Тываның Барыын-Хемчик кожуунда “Таежный” уруглар лагеринде капитал септелге ажылдары эгелээнин регионнуң өөредилге сайыды Ренат дыңнаткан. Муниципалдыг чагыргалар төлээлери видеоконференция дамчыштыр комиссияның ажылынга база киришкен.
Республика Баштыңы Владислав Ховалыгның деткимчези-биле, 2023 чылда “Таёжный” уругларның кадыкшыл лагери Россияның Чырыдыышкын яамызының «2030 чылга чедир Россия Федерациязының субъектилеринде уругларның дыштанылга болгаш кадыкшылга организацияларын катап тургузары болгаш хөгжүдери» деп федералдыг программа күүселдези-биле капиталдыг септелгелер кылыр конкурс шилилдезин эрткен. Лагерь Ак-Довурак хоорайның өөредилге эргелелинге хамааржыр болгаш, Барыын-Хемчик кожуунның бойдус чурумалдыг чараш черинде турар. Аъш-чем болгаш эмнелге албан черлерин чаартырынче угланган улуг септелге бо неделяда эгелээн.
Ак-Довурак хоорайның өөредилге эргелелиниң төлээлери видеохарылзаа дамчыштыр «Таежный» лагериниң девискээринде эде тудуушкун ажылдары эгелээнин дыңнаткан. «Туваасбестрой» КХН күрүне чагыынга конкурс түңнелдеринге даянып, ажылдарны кылыр.
Тываның өөредилге сайыды албан-хүлээлгениң күүседикчизи чай дүшкүжеге чедир септелге ажылдары доосту бээрин комиссия кежигүннеринге дыңнаткан. Ынчап кээрге, уруглар бо чайын чаарттынган оран-саваларга, экижиткен байдалдарда дыштанырлар.
РФ-тиң Өөредилге яамызының уругларның чайгы дыштанылга лагерьлериниң чемненилге болгаш эмнелге блогунуң капиталдыг септелгезин чорудар конкурс шилилдезин Тес-Хем кожууннуң «Сайлык» кадыкшылга лагери база эрткенин сагындыраал. Оон аңгыда конкурс шилилдезин Улуг-Хем кожууннуң «Чодураа» стационар лагериниң капиталдыг эвес ийи объектизин тудар төлевилел эрткен. Ооң девискээринде тудуг ажылдары 2026 чылда эгелээр.
Чазак Даргазының оралакчызы, ведомстволар аразының комиссия даргазы Орлан Сарыглар Өөредилге яамызынга болгаш Ак-Довурак хоорайның чагыргазынга «Таежный» лагеринче ажылчын бөлүктерни чорудуп, септелге ажылдарының күүселдезинге контрольду күштелдирер даалганы берген. Ажылдың кол кезиин май 10-га чедир доозар.