Регионнуң өөредилге сайыдының хүлээлгезин күүседип турар Ренат Ооржак уруглар дыштанылгазын болгаш кадыкшылгазын организастаар айтырыглар талызы-биле ведомстволар аразының хуралында 2025 чылдың чайгы кадыкшылга кампаниязынга белеткел чорудуунуң дугайында дыңнадыгны кылган. Тыва Республиканың Чазааның даргазының оралакчызы Орлан Сарыгларның даргалаашкыны-биле хурал эрткен.
Роспотребнадзорнуң Тыва Республикада эргелелиниң, Россияның ОБЯ Тыва Республикада кол эргелелиниң, Росгвардияның Тыва Республикада эргелелиниң база Тыва Республика талазы-биле ИХЯ төлээлери хуралга киришкен.
Өөредилге сайыдының дужаалы-биле бадылаан реестрде, 2025 чылда уруглар дыштанылгазын болгаш кадыкшылгазын организастаарынче 175 лагерь кирген. Ол лагерьлер эрткен чылга деңнээрге 530 уруг хөй, азы 18363 уругну дыштандырып, кадыкшыдар. Лагерьлер начальниктери, эмчи ажылдакчылары, чем кылыр ажылчыннар болгаш вожатыйлар дээш, 3 муң ажыг кижи чайгы кадыкшылга кампаниязынга ажылдаар.
149 хүндүскү, 22 стационарлыг база 4 майгын лагерьлериниң баазазынга уругларның дыштанылгазын организастаар. Күрүне албан черлериниң ажылдакчыларының прфоэвилели база кадыы кызыгаарлыг уругларның Хөндергейниң школа-интернады бо чылын ийи – «Серебрянка» биле «Ыраажы-Хем» стационарлыг лагерьлерни ажыдарын дыңнаткан.
Хүндүскү лагерьлерни июньнуң 1-3, стационарлыг лагерьлерни июнь 5-17 хүннеринде, а оларга хамааржыр майгын лагерьлерни июнь ортан үезинде ажыдары планнаттынган.
Тываның лагерьлери профилактика учеттарында уругларны база дыштанылгаже хаара тудар. Кадыкшылы кызыгаарлыг 1800 ажыг оолдар, уруглар школа чанының, стационарлыг база майгын лагерьлеринге дыштаныр аргалыг.
«Кайда-даа хаара туттунмаан» деп бөлүктээн уругларның чайгы дыштанылгазын организастаары-биле культура бажыңнарынга, библиотекаларга, немелде өөредилге черлеринге, спорт школаларга түр үениң 250 дыштанылга төптерин ажылдадып, аңаа 9 муң ажыг элээдилерни дыштандырар.
Улуг-Хем кожууннуң «Чодураа», ТР-ниң Күш-ажыл яамызының «Байлак», Тес-Хем кожууннуң «Сайлык» лагерьлеринге Баштайгыларның шимчээшкини «Баштайгыларның үези» деп тускай сменаны организастап, 1 муң ажыг оолдар, уругларны хаара тудары көрдүнген.
Республиканың аграрлыг школа-интернадының баазазынга 1-4 калсстарның өөреникчилеринге «Содружество Орлят России» тускай смена ажылдаар.
Ужуражылганың түңнелинде, уругларның дыштанылгазын болгаш оларның кадыкшылгазын организастаарда санитар-эпидемиологтуг болгаш күш-ажыл хоойлужудулгазынга база террорга болгаш өртке удур айыыл чок чоруктуң негелделеринге дүүштүр хыналданы күштелдирерин яамылар болгаш ведомстволар, муниципалдыг чагыргалар удуртукчуларынга дагзырын ведомстволар аразының комиссиязының кежигүннеринге айыткан.