«Маадырларның үези» деп федералдыг программа ышкаш «Тываның маадырлары» кадрлар программазының сайгарылгазынга Тыва Республиканың Чазааның Даргазының оралакчызы хүлээлгени күүседип турар Айдыс Сынаа, ТР-ниң Дээди Хуралының (парламентизиниң) даргазы Каң-оол Даваа болгаш депутаттар, «Ада-чурт камгалакчылары» күрүне фондузунуң регионалдыг салбырының удуртукчузу Мерген Кызыл-оол, Тываның күрүне университединиң, хөй-ниити организацияларының төлээлери, дайынчы хөделиишкиннер хоочуннары болгаш амгы үеде шериг албанныглар киришкен.
Регионнуң баштыңы Владислав Ховалыг Москвага сургакчылаашкында-даа болза, тускай шериг операциязының киржикчилериниң болгаш хоочуннарының билиг-мергежилин эде белеткээринче угланган чугула төлевилелди деткээни дээш, Тыва парламентиниң депутаттарынга өөрүп четтиргенин илереткен.
«Президент Владимир Владимирович Путинниң чугаалааны дег, шериг албанныгларның аразында удуртукчу албан-дужаалдарны ээлеп шыдаар оолдар кайы хөй. “Маадырларның үези” деп федералдыг программадан бистиң программавыстың ылгалы – ортумак тускай эртемниг дайынчылар аңаа киржип болур. Россияның улус ажыл-агыйы болгаш күрүне албаны академиязының “Күрүне эргелеп-башкарылгазының дээди школазынга” база бистиң Тываның күрүне университединге төлевилелди ажылдап кылырынга деткимчези, ону боттандырарынга кады ажылдажылгазы дээш, четтиргенимни илередип тур мен. Ам июньда күрүне эргелеп-башкарылгазының дээди школазының программалары-биле эде белеткел эртер шериг албанныгларның даңзызын алыр ужурлуг бис. Өөредилге боду сентябрь 1-де эгелээр» - деп, Владислав Ховалыг бодунуң блогунда бижээн.
«Тываның маадырлары» - Владимир Путинниң эрткен чылын чарлааны «Маадырларның үези» деп президентиниң кадрлар программазының регионалдыг хевири болур. Тываның Баштыңы Владислав Ховалыг регион программазын эгелээрин республиканың Дээди Хуралынга бодунуң Айыткалынга дыңнаткан.
Тускай шериг операциязының киржикчилери болгаш хоочуннары депутаттар корпузунуң составында кирип турарын демдеглээри чугула. Ужуражылгага Аяс Санчат, Андрей Монгуш, Буян Донгак база Россияның Маадыры Чалым Чүлдүм-оол олар киришкен.
Программаны ажылдадыр болгаш боттандырар ажылчын бөлүктүң кежигүннери төлевилелге киржир дизе, rsv.ru/ деп шөлүгге бүрүткедип алгаш, ооң соонда программаның дугайында шупту медээлерни киирген project.rsv.ru/geroi_tuvy деп сайтче азы ГЕРОИТУВЫ.РФ деп сайтыже кирерин тайылбырлаан. Бүрүткел соонда, өөредилгеже шилилдени эртер. Сайтыга бүрүткедириниң болгаш шилилге чадаларын эртериниң чурумун ында тодаргай тайылбырлаан.
Оргкомитет даргазының оралакчызы Шолбан Хомушку программаның ажылдакчылары кордакчыларны бүрүткээринге база хууда кабинетти ажыдарынга дузалажырынга беленин дыңнаткан. Сайтыга бүрүткедир азы билдириишкин киирер дугайында айтырыгларлыг болза, 8 (93422) 9-73-45 дугаарлыг телефон-биле долгааш, тодаргайлап болур.
Тываның күрүне университединиң болгаш Чонну ажылга хаара тудар төптүң төлээлери сөстү алгаш, ТШО хоочуннарын болгаш киржикчилерин өөредир хевирлерни болгаш ажылга хаара тударының аргаларын чугаалаан.
Сайгарылгаже чалаттырган ТШО хоочуннары, амгы үениң шериг албанныглары база “Маадырларның үези” деп федералдыг программа езугаар белеткелди эрткен кижилерниң талазындан, амгы үеде тулчуп турар дайынчыларны, мобилизациядан халашкан шериг албанныгларны бүрүткелин база шилилдезин организастаарынга, ол ышкаш өөредилгезин доозуптарга ажылга хаара тударынга хамаарышкан айтырыгларны салган.
Төлевилелдиң ажылчын бөлүүнге бо талазы-биле – «өөредилге – ажылче хаара тудуушкун» четкини чурумчудуп, мобилизациядан халашканнарның учедун шериг комиссариады-биле кады тургузар даалганы берген.