Тывада бирги уруглар солуну «Сылдысчыгаш» 80 харлаан. Юбилейлиг хүнге тураскааткан хемчегге солуннуң төөгүзүн болгаш келир үезин үнелеп чоруур кижи бүрүзү чыылган. Республика Чазааның даргазының оралакчызы Айдыс Сынаа Тываның Баштыңы Владислав Ховалыгның өмүнээзинден редакцияның ажылдакчыларынга чылыг байырны чедирип, тыва парлалганың хөгжүлдезинге ук үндүрүлгениң улуг ужур-дузазын демдеглээн. Ооң чугаазы-биле алырга, “Сылдысчыгаш” солун он-он чылдар дургузунда аныяк салым-чаяанныгларның чогаадыкчы өзүлдезиниң шөлчүгежи апарып, оларга уран чогаалче болгаш уран чүүлче оруун ажыткан.
Солун амыр эвес үелерни база эрткен: чечектелиишкин үелери шенелдениң чылдары-биле солчуп, солуннуң үндүрүлгези түр када соксаан. Ынчалза-даа номчукчуларның ынакшылы болгаш чаңчылдарга бердингени, солуннуң катап үнүп эгелээринге дузалаан. Айдыс Сынаа бергелер турзажок, ону үндүрүп турган кижилерниң хей-аъды кажан-даа читпээн дээрзин демдеглээн.
Чазак Даргазының оралакчызы аңгы-аңгы чылдар дургузунда “Сылдысчыгаш” солунну чырыкче үндүрүп белткээринге үлүүн киирген шупту редакторларга, журналистерге, авторларга өөрүп четтириишкинниң сөстерин илереткен. «Сылдысчыгаш” моон-даа соңгаар кижизидикчи, каттыштырыкчы соруун салбазын» - деп, Айдыс Сынаа кижи бүрүзүнге кадыкшылды, чогаадыкчы чедиишкиннерни, а солунга ам-даа узун орукту күзээн.
«Сылдысчыгаш» биле «Тываның аныяктары» солуннарның кол редактору Мира Конгул-оол биле «Сылдысчыгашты» хөй чылдарда удуртуп чораан хоочун журналист Александр Шоюнга тыва журналистиканың хөгжүлдезинге киирген үлүг-хуузу болгаш хөй чылдарда ак сеткилдиг ажылы дээш «ССРЭ-ниң составынче Тыва Арат Республиканың эки тура-биле каттышканының 80 чылы” юбилейлиг медальдарны байырлыг байдалга тывыскан.
Тывада бичии уругларга болгаш аныяктарга бир дугаар тыва дылда үнген «Сылдысчыгаш» солуннуң бирги үндүрүлгези 1945 чылдың март 1-де чырыкче үнген. Солун неделя санында 7000 экземпляр тиражтыг, өртээ 15 көпеек турган. ВЛКСМ Тыва обкому база Кызыл хоорай комитеди - ооң баштайгы тургузукчулары. Солуннуң бирги харыысалгалыг редактору Далай-оол чораан, ооң соонда Т. Бегзини (1945-1947), оралакчызынга М. Балчий-оолду томуйлаан. 1948 чылда Н.Л. Кунчун, а 1949 чылда К.С. Шойгу редакторлаан.
Солуннуң тургустунганы республиканың культурлуг амыдыралынга, аныяктарның эртем-билиинге чугула болуушкун болган. «Сылдысчыгаш» өзүп орар салгалды патриотчу чорукка база Төрээн чуртунга ынакшылды кижизидеринге улуг рольду ойнаан.
Ындыг болзажок, 1959 чылда СЭКП Төп Комитединиң “Солун-сеткүүлдерниң үре-түңнел чок чоруун чайладыр дугайында” доктаалы езугаар, обком элээн каш парлалга үндүрүлгелерин, ооң иштинде “Сылдысчыгаш” солунну парлаарын соксадыр шиитпирни хүлээп алган. 1960 чылдан 1985 чылга чедир «Тываның аныяктары» солунга тускай арыннар кылдыр ол үнүп турган.
1990 чылдың февраль 1-де солун долузу-биле катап үнүп эгелээн. Ол чүүл тыва интеллигенцияның төлээлериниң туруштуг негелделериниң ачызында боттанган. Дыка хөй чылдарда ооң солуттунмас редактору чораан Александр Шоюн солуннуң катап үнүп, хөгжүүрүнге онза улуг рольду ойнаан.