Владислав Ховалыг тускай шериг операциязының командылал составындан идепкейлиг киржип чоруур дайынчыларның авалары-биле Бүгү-делегейниң херээженнер хүнүнүң бүдүүзүнде ужурашкан. Республика Баштыңы эрес-дидим дайынчыларны өстүрүп каан херээжен чонну Национал театрга байырлыг ужуражылгаже чалап, олар-биле чугааны чоруткан.
Республика Баштыңы ужуражылганы, кадр офицерлери дээрге, чуртту башкарарынга чигзиниг чокка бүзүреп болур кижилерниң тускай бөлүү-дүр дээн, РФ-тиң Президентизи Владимир Путинниң чугаазы-биле эгелээн. 2024 чылдың февральда, Президент «Маадырларның үези» деп кадрлар программазын эгелээрин чарлап тура, «Олар кажан-даа аткаарлавас, дүжүп бербестер. Олар өөредилге системазында, хөй-ниити каттыжыышкыннарында, күрүне болгаш муниципалдыг эрге-чагырга системазында удуртукчу туруштарны ээлээр ужурлуг. Регионнарны, бүдүрүлгелерни, эң-не улуг хөй-ниити төлевилелдерин удуртуп баштаар» деп демдеглээн.
Владислав Ховалыг ТШО киржикчилерин деткиир талазы-биле регионалдыг эрге-чагыргаларның амгы үеде ажылдап турар төлевилелдериниң дугайында чугаалаан. Ында ТШО зоназынче чорудар боттарывыстың радиоэлектроннуг демисел системаларын кылыры, ТШО киржикчилериниң өг-бүлелеринге, ылаңгыя оларны ада-ие төлевиринден хостаары дээш, оон-даа өске социал деткимче программаларын бадылаан. Регионнуң удуртукчузу авалардан боттарының арга-дуржулгазын, сагыш-сеткилин, күзелдерин үлежирин дилээн.
— Тускай шериг операциязының киржикчилерин деткиир айтырыглар-биле хүннүң ажылдап турар бис. Айтырыглар-ла хөй. Оларны силер эки билир силер, ынчангаш силер-биле чугаалажып, ону дыңнаксап тур мен – деп, Баштың чугаалаан.
Авалар оолдарының дугайында, шериг мергежилди канчаар шилип алганын, Ада-чуртун камгалаар шиитпирни канчаар хүлэп алганын чугаалааннар. Республиканың аңгы-аңгы кожууннарындан келген шериг албанныгларның өг-бүлелерин ёзулуг эр кижилерни кижизидип, Ада-чурттуң камгалакчылары кылдыр өстүрүп каан ажы-төлүнүң салым-чолу каттыштырып турар.
Эрзинниң төп кожуун эмнелгезинге бүгү назынында ажылдап чораан күш-ажылдың хоочуну Светлана Доржуевна ийи оолду кижизиткен. Улуг оглу Сүрен – 55-ки аңгы мотоадыгжы бригаданың (гвардейжи) подполковниги, Донецк Улус Республиканың Авдеевка суурну эжелеп алган үезинде алдаржаан.
Антонина Николаевна Шикунованың оглу, ефрейтор болгаш пулеметчу Алексей Викторович Шикунов «Тускай шериг операциязының киржикчизи» тураскаалдыг медальдыг эдилекчизи.
Любовь Сандановна Тюлюштуң оглу Артур ада-иезиниң изин изээн офицер. Ол шериг албанын эрттиргеш, Омскиниң автобронетанк инженер институдунче өөренип кирген. Бо хүнде ол тускай шериг операциязында капитан эргелиг киржип турар. Тюлюш Артур Сылдысовичини 2022 чылда РФ-тиң Президентизиниң Чарлыы-биле “Георгий Жуков” медалы-биле шаңнаан.
Айдана Серээевнаның Маспык-оолдуң чаңгыс оглу Чингис – улуг лейтенант, Балтика флодунуң танк кезээниң рота начальниги. РФ-тиң Президентизиниң Чарлыы-биле Чингис Болатович Ховалыгга 2024 чылда Суворовтуң медалын тывыскан.
Анжела Көк-ооловна Хорлуг-оолдуң хеймер оглу Күдерек тускай шериг операциязы чарлаттынганындан бээр киржип турар. Дайынчы шылгарал дээш Хорлуг-оол Күдерек Эрес-оолович РФ-тиң Камгалал яамызының ведомство база Донецк Улус Республиканың шаңналдары-биле шаңнаткан.
Чойгана Ак-ооловна Уржанайның ортун оглу Наадым тускай шериг операциязының киржикчизи. Ол 15 харлыында Кызылдың президентиниң кадет училищезиниң бир дугаар доозукчулары-биле дооскаш, Новосибирскиниң дээди шериг командылал училищезинче дужаап кирген. 2022 чылда доозупкаш, ол дораан тускай шериг операциязының зоназынче албан эрттирип чорупкан.
Саяна Ланзыевна Халбаажыктың оглу Байсклан Сибирь федералдыг университединиң шериг-инженер институдун дооскаш, Амур облазында Благовещенск хоорайда шериг кезээ-биле керээни чарган. Амгы үеде тускай шериг операциязының киржикчизи, взвод командири. Эрес-дидим албан-хүлээлгези болгаш дайынчы шылгаралы дээш РФ-тиң Президентизиниң Чарлыы-биле «Эрес-дидим чорук дээш» медаль-биле, Суворовтуң медалы-биле шаңнаткан, РФ-тиң Камгалал яамызының «Тускай шериг операциязының киржикчизи» деп медалының эдилекчизи.
Регионнуң баштыңы маадырларның аваларынга шыдамыы, ынакшылы болгаш эрес-дидим чоруу дээш сеткилиниң ханызындан четтиргенин илереткеш, олардан айтырыгларытургустунуп кээр болза, оларны шиитпирлээринге дузалажырынга беленин илереткен. Владислав Ховалыг офицерлерниң авалары-биле доктаамал харылзааны тудуп, оларны хандырарынга хамаарышкан айтырыгларны тускай контрольга тударын бодунуң ТШО айтырыгларының талазы-биле тускай төлээзи Тимур Кууларга дааскан.