Март 10-да «Аныяктар болгаш уруглар» национал төлевилел езугаар «Профессионалдар» тускай мергежилдер чемпионады Тыва Республикада эгелээн. «Профессионалитет» деп президентиниң эгелээшкини-биле организастаан ук хемчегни республикада он дугаар эртирип турар. Чаңчылчаан мөөрейлерден аңгыда, бедик технологиялар ажыглаан чемпионат бир дугаар болуп турары ол.
Бир неделя дургузунда үргүлчүлээр мөөрейниң 35 аңгы угланыышкыннарынга 200 хире киржикчилер киржир. Студентилерден аңгыда, школачылар “Юниор” бөлүкте киржип турар. Олар даш болбаазырадылгазы болгаш информастыг технологиялар дээн ышкаш угланыышкыннарга шылгалдаларны эртер. Келир үениң специалистеринге бо мөөрейлер профессионал бот-сайгарылгаже оруктуң чугула базымнары апарып, боттарының арга-шинээн ажыдарынга, күжүнге бүзүрелди оттурарынга болгаш депшип ажылдаарының келир үезинге тодаргай шиитпирни тургузарынга дузалаар.
«Бедик мергежилдиг, хереглелдиг ажылчыннарның чаа салгалын тургузарынга бүгү күжүвүстү үндүрүп турар бис. Тываның экономиктиг хөгжүлдезинге дээш, аныяктарны кедилиг профессиялар болгаш тускай мергежилдерже угландырары чугула – деп, Тываның Баштыңы Владислав Ховалыг бодунуң блогунда бижээн. – Профессионал өөредилге чедип алырының негелдези өзүп турар. Ынчангаш статузу база бедээн. «Профессионалитет» федералдыг төлевилел бисте кол угланыышкыннарлыг үш кластерде хөгжүп турар: көдээ ажыл-агый, тудуг болгаш даг херээ».
Тываның Баштыңы конкурс киржикчилериниң шиңгээдип алган билиглери болгаш арга-дуржулгазы, оларның амгы болгаш келир үеде мергежилдери – республиканың экономиказын хөгжүдеринге, инвестиция төлевилелдерин боттандырарынга, бедик технологиялыг адырларны тургузарынга үндезин болур, ол ышкаш чедип алган билиглерниң шынарының кол үнелели болур деп онзалап демдеглээн.
Владислав Ховалыг Тываның Дээди Хуралынга 2025 чылга берген Айыткалында бистиң республиканың шупту стратегтиг төлевилелдери келир үеде республика хөгжүлдезиниң кол угланыышкыннарын тургускан бедик технологтуг үндезин апаар деп демдеглээнин сагындыраал. Регионнуң Баштыңы бедик технологиялыг үлетпүр аныяктарның профессионал тургустунуушкунунуң болгаш өзүлдезиниң, орулгаларының өзүлдезиниң болгаш республикада амыдыралдың шынарын бедидериниң таваа деп айыткан.
Бо чылын чаа адырлар аразынче «Кидис уран чүүлү» болгаш «Чүък машиназының чолаачызы» деп мергежилдер кирген. Киржикчилерниң мобильдиг оюннар болгаш капсырылгалар тургузарынга боттарының билиг-мергежилин көргүзер бедик технологиялар чемпионады программада бир дугаар кирген. Мөөрейниң регионалдыг чадазы киржикчилерниң белеткелиниң бедик деңнелин, амгы үениң аргаларын болгаш дериг-херекселдерин ажыглап билир көргүскен. Ажылды 270 ажыг специалистер, оларның аразында кол болгаш индустрия эксперттери үнелээр.
Аныяктарның мындыг хемчээлдиг улуг хемчегге киржилгези чүгле арга-дуржулгазын эвес, а боттуг ажыл берикчилеринге боттарын көргүзүп, шилип алганы мергежилинге чедиишкинниг келир үени тургузарынга эгени салыр. Мөөрейниң түңнелдерин болгаш тиилекчилерниң аттарын ажылчын неделязының төнчүзүнде чарлаар.