Марттың 14-тен 17-ге чедир Тыва Республика хары угда ийи спортчу маргылдааның: Сибирь федералдыг округунуң сумо маргылдаазының база эр, херээжен улус аразынга спортчу хүреш чемпионадының киржикчилерин хүлээп алыр.
Чемпионаттарга тиилээн мөгелер спорттуң ук хевирлеринге бүгү-российжи маргылдааларга киржип, спорт мастери атты камгалап алыр аргалыг. Маргылдааларны Совет Эвилелиниң Маадыры Түлүш Кечил-оол Балдановичиниң чырык адынга база Россияда болгаш Тывада чарлаттынган Улуг Тиилелгениң 80 чыл оюнга болгаш Ада-чурт камгалакчызының чылынга тураскаадып эрттирер.
Тываның Спорт яамызының регионнар аразының, бүгү-российжи болгаш делегей чергелиг күш-культура болгаш спортчу хемчеглерниң Чаңгыс аай календарь планы езугаар чемпионаттарны эрттирер болгаш, регионга кадык амыдыралды нептередип, спортчуларның арга-дуржулгазын бедидип база спорттуң ол хевирлерин хөгжүдер сорулгаларны салган.
Тываның Спорт яамызы, Тыва Республиканың Спортчу хүреш болгаш Сумо федерациязы база Тыва Республиканың чыынды командаларының спортчу белеткел төвү маргылдааны организастап эрттирер.
Сибирь федералдыг округунуң спортчуларының аразынга спортчу хүреш маргылдаазы марттың 15-тен 17-ге чедир болуп эртер. Марттың 15-те 14:00 шакта «Сүбедей» спорт комплекизинге спортчу хемчегниң байырлыг ажыдыышкыны эрткен соонда, кол маргылдаалар эгелээр.
Красноярск крайдан, Хакас Республикадан, Новосибирск, Иркутск база Кемерово областардан база Тывадан чыында командалар чемпионатка киржирин регионалдыг Спорт яамызы дыңнаткан. Оон аңгыда Омск, Томск областардан, Алтай крайдан база Алтай Республикадан мөгелерниң келирин манап турар.
Красноярск край, Хакас Республика, Новосибирск, Иркутск база Кемерово областарның төлээлери сумо чемпионадынга киржир чагыгны киирген. Тыва Республикадан чүс ажыг сумо мөгелери шөлче үнер.
Маргылдааларга 2007 чылда төрүттүнген база оон өрү назылыг, спортчу 3-кү разрядтан эвээш эвес, а сумога 1-ги разрядтан эвээш эвес белеткелдиг спортчулар киржир.
Марттың 14-те «Сүбедей» спорт комплекизинге сумо хүрежинге чемпионаттың байырлыг ажыдыышкыны 13 шак 30 минута турда эгелээр.